2022 jyldyń I toqsanynda memlekettik búdjetke 3 trln 739 mlrd teńge somasynda kiris tústi. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy Almaty-akshamy.kz.
«Osy jylǵy birinshi toqsannyń qorytyndysy boıynsha, memlekettik qarjynyń atqarylý kórsetkishteri bylaı qalyptasty: memlekettik búdjetke transfertterdi esepke almaǵanda 3 trln 739 mlrd teńge somasynda kiris tústi nemese jospar 107,1 paıyzǵa oryndaldy», - dedi ol.
Mınıstrdiń atap ótýinshe, respýblıkalyq búdjetke 2,6 trln teńgege jýyq kiris kirdi nemese jospar 100,7 paıyzǵa oryndaldy.
Kiris boıynsha jospar 17 mlrd teńgege, onyń ishinde salyq 5 mlrd teńgege, salyqtan bólek jospar 12 mlrd teńgege asyra oryndalyp otyr.
«Salyq boıynsha asyra oryndaýdyń negizgi somalary korporatıvtik tabys salyǵyna, shıki munaıǵa eksporttyq kedendik bajǵa, oıyn bıznesine salynatyn salyq jáne paıdaly qazbalardy óndirýge salynatyn salyqqa tıesili boldy», - dedi Erulan Jamaýbaev.