Olar qaladaǵy temir qabyldaıtyn jerdiń bárin aqtaryp, eldimekendegi kásipkerlerdi de tynysh qaldyrmapty.
Aıta keteıik, birneshe kún buryn ataqty rejıser Ázirbaıjan Mámbetov pen kompozıtor Ǵazıza Jubanovanyń nemereleri marqumdardyń qabirindegi eskertkishtiń joǵalǵanyn habarlaǵan edi.
100 gektardy alyp jatqan Keńsaı zıratynda buǵan deıin de urlyq bolǵan. Bul joly qaraqshylar halyq ártisteriniń qabirin tonap ketti. Qylmys qashan jasalǵany ázirge belgisiz, biraq jıirkenishti áreket rejıser Ázirbaıjan Mambetov pen kompozıtor Ǵazıza Jubanovanyń nemereleri dabyl qaqqanda ǵana málim boldy.
Marqumdarǵa Quran baǵyshtaýǵa kelgende, beıittegi qoladan quıylǵan qulynshaq kórinbegen.
Tonalǵan qabirde erli-zaıypty Mámbetov pen Jubanova jáne olardyń 3 jasynda kóz jumǵan Ahan esimdi uly jerlengen. Marqumnyń týystary bul beıit buryn da tonalyp edi deıdi. Ol kezde qulynshaqqa tımegen, alaıda marqumdardyń tas eskertkishin sypyryp ketken. Bul derekti zırat kúzetshileri de jasyrmady.
«Iá, ol kezde urylardy tappady. Ózderi qalpyna keltirdi. Biz ol kúni eshteńe baıqamadyq, keıin urlyq bolǵanyn bildik. Jan-jaqtyń bári ashyq. Osy jerde ǵana qorshaý bar. Artqy jaqtyń bári úıler. Kez kelgen adam kire alady», – dedi zırat kúzetshisi Jasulan Ordahan.
Keńsaıdy 10-nan astam adam kúzetedi. Alaıda búgin kóbi kórinbedi, olardy polısıa suraq-jaýap alýǵa shaqyryp alypty. Qazir oqıǵaǵa qatysty aýqymdy tergeý júrip jatqan kórinedi.
«Birinshi kezekte túrli-tústi metaldy qabyldaý oryndary tekserilýde. Qaladaǵy osyndaı 144 nysan qaraldy. Almaty oblysy Talǵar aýdanyndaǵy 15 jer tekserilgen bolatyn», – dedi Polısıa departamentiniń resmı ókili Saltanat Ázirbek.
Tarıhta qalǵan kisilerdiń qabirin tonaǵandar ustalsa, ońaı qutylmaıyn dep tur. Olardyń bul áreketine qylmystyq is qozǵalyp qoıǵan. Quzyrly organ ókilderi mundaı urlyq úshin kem degende 3 jylǵa bas bostandyǵynan aıyratynyn málimdedi.