Qazaqstan Úkimeti «Qoljetimdi Internet» ulttyq jobasyn bekitti. QR Premer-Mınıstri Álıhan Smaıylov tıisti qaýlyǵa qol qoıdy, dep habarlaıdy almaty-akshamy.kz
Ulttyq joba Memleket basshysynyń respýblıkanyń ınternet salasyn damytý jónindegi tapsyrmalaryn oryndaý maqsatynda qabyldandy. Onyń negizgi maqsaty – halyqty jyldamdyǵy keminde 100 Mbıt/s keń jolaqty ınternetpen qamtý.
«Qoljetimdi Internet» ulttyq jobasy 2024 jyldan bastap 2027 jylǵa deıingi kezeńdi qamtıdy jáne ony iske asyrýǵa 1,5 trln teńgeden astam qarajat kózdelgen. Aıta ketý kerek, bul somanyń kólemdi bóligi, ıaǵnı 1,3 trln teńgeden astamy – búdjetten tys qarajat.
Joba aıasynda aıtarlyqtaı qarajat symdy jáne symsyz baılanys ınfraqurylymyn damytýǵa baǵyttalatyn bolady. Aýyldyq jerlerde talshyqty-optıkalyq baılanys jelileriniń tarmaqtalǵan júıesin salýǵa basa nazar aýdarylmaq. Máselen, memlekettik-jekeshelik áriptestik tetigi arqyly 3 myńnan astam aýylda tıisti baılanys jelilerin montajdaý josparlanyp otyr.
Jalpy shaǵyn jáne orta baılanys operatorlaryn qoldaý arqyly 400 myń úı sharýashylyǵyna jyldamdyǵy joǵary ınternet tartylatyn bolady. Jekemenshik operatorlar tarapynan ınvestısıalardyń jalpy somasy 92 mlrd teńge bolǵan jaǵdaıda, onyń jartysyn memleket kúrdeli shyǵyndarǵa sýbsıdıalar túrinde qaıtaratyn bolady.
Ulttyq joba aıasynda respýblıkalyq jáne negizgi oblystyq avtojoldardy mobıldi ınternetpen qamtý úshin sıfrlyq ınfraqurylym salý josparlanǵan. Atap aıtqanda, 487 antena-dińgek qurylysyn ornatý josparlanyp otyr. Bul 17 myń shaqyrym avtojoldy mobıldi ınternetpen qamtýǵa múmkindik beredi.
Taǵy bir baǵyt 5G jelisin odan ári óristetý bolmaq. Búgingi tańda 605 bazalyq stansıa ornatylǵan. 2025 jyldyń sońyna deıin 5G tehnologıasyn respýblıkalyq mańyzy bar qalalar men oblys ortalyqtarynyń barlyǵyna engizý josparlanyp otyr. Osy jumys aıasyndaǵy baılanys operatorlarynyń ınvestısıalary shamamen 300 mlrd teńgeni quraıdy.
Ulttyq joba aıasynda iri derekter ortalyqtaryn jáne transshekaralyq talshyqty-optıkalyq magıstraldardy salý boıynsha sharalar josparlanǵan. Sondaı-aq respýblıkaǵa jetekshi halyqaralyq IT-kompanıalardy tartý úshin zańnamany ózektendirý qajet.
Jalpy ulttyq jobany iske asyrý 2027 jylǵa deıin qazaqstandyqtardy jyldamdyǵy joǵary ınternetpen qamtý deńgeıin 100%-ǵa deıin jetkizýge jáne eldiń óńirdegi sıfrlyq hab retindegi pozısıasyn nyǵaıtýǵa múmkindik beredi.