Esirtkige qarsy 130 operasıa júrgizildi
Memleket basshysy Qasym-Jomart Toqaevqa Ulttyq qaýipsizdik komıtetiniń 2022 jylǵy atqarǵan jumystarynyń negizgi qorytyndysy jáne aldaǵy kezeńge arnalǵan jospary týraly baıandaldy, dep habarlaıdy Almaty-akshamy.kz.
Aqordanyń habarlaýynsha, Ermek Saǵymbaev byltyr arnaýly qyzmetti reformalaý jáne onyń jumysyn jandandyrý jónindegi Prezıdent tapsyrmasynyń oryndalǵanyn jetkizdi. Onyń aıtýynsha, terorıstik qaterlerdi azaıtý úshin aldyn alý jumystary júrgizildi. Úsh terrorlyq aktige daıyndyq kezeńinde tosqaýyl qoıyldy. Kezekten tys prezıdenttik saılaý kezinde jappaı tártipsizdikti josparlaǵan radıkaldy top joıyldy. Lańkestik jáne ekstremıstik qylmystar jasaǵany úshin 56 adam sottaldy. Terorızm men dinı ekstremızmge qatysy bar 134 shetel azamatynyń elge kirý áreketiniń joly kesildi.
Memleket basshysyna quqyq qorǵaý organdarymen birlesip, elimizdegi krımınogendik jaǵdaıdy aıtarlyqtaı jaqsartqany týraly málimet berildi. Asa qaýipti 15 uıymdasqan qylmystyq top quryqtalyp, olardyń 56 basshysy jáne belsendi músheleri ustaldy. 1 100-den astam qarý, 598 granata jáne 31 860 oq-dári zańsyz aınalymnan shyǵaryldy. Tárkilengen qarýdyń jartysyna jýyǵy qańtar oqıǵasy kezinde urlanǵan.
Esirtkige qarsy 130 operasıa júrgizildi. 1,3 tonna ártúrli esirtki tárkilendi. Sheteldik seriktestermen birge 96 halyqaralyq jáne óńirlik esirtki jetkizý arnasy toqtatyldy. Sıntetıkalyq esirtki óndirisimen aınalysqan 28 zerthana joıyldy. 32 zańsyz kóshi-qon arnasynyń joly kesilip, olardy uıymdastyrýshylarǵa qatysty 12 qylmystyq is qozǵaldy.
Memlekettik qupıalardy qorǵaý júıesin damytý jóninde keshendi sharalar iske asyryldy. UQK tehnıkalyq qyzmetteri asa mańyzdy ınfraqurylym obektilerine jasalǵan 341,8 mıllıon kıber jáne 2 954 DDoS-shabýylǵa toqsaýyl qoıdy.
Memlekettik shekarany buzǵan 15 603 adam ustaldy. Shekara arqyly quny 21,9 mıllıard teńge bolatyn valúta, altyn jáne ózge taýarlardy zańsyz ótkizýge jol berilmedi.
Kezdesý sońynda Memleket basshysy ulttyq qaýipsizdik organdary qyzmetiniń baǵyttary boıynsha birqatar naqty tapsyrma berdi.