Komıtet esirtkiniń taralýyna tosqaýyl qoıýdy kúsheıtti.
UQK baspasóz qyzmetiniń málimdeýinshe, bıylǵy sáýir men mamyr aılarynda UQK Qyrǵyz Respýblıkasy jáne Ózbekstan elderiniń arnaýly qyzmeti men quqyq qorǵaý organdarymen birlesip, 30-dan asa esirtkige qarsy operasıa júrgizdi, dep habarlaıdy Almaty-akshamy.kz.
Esirtki trafıginiń 9 halyqaralyq jáne 14 óńirlik arnasy joıyldy. Sıntetıkalyq esirtki óndiretin 8 iri jasyryn zerthananyń jumysy toqtatyldy.
Arnaıy operasıalar barysynda esirtki tasymaldaǵan 15 adam ustaldy. Zańsyz aınalymnan barlyǵy 223 keli esirtki, onyń ishinde 90 keli sıntetıkalyq esirtki (270 myń ret qoldanylatyn mólsher – red.), 85,2 keli marıhýana, 14 keli apıyn, 4 keli gashısh alyndy. Budan basqa, 800 ekstazı tabletkasy, 500 túp «goland» marıhýanasy jáne psıhotroptyq zat daıyndaýǵa arnalǵan 4 tonna hımıalyq reagent joıyldy.
2 aı ishinde alynǵan esirtkiniń «qara naryqtaǵy» jalpy somasy 2,3 mlrd teńgeden asady.