Jer máselesine qatysty tergeý júrgizilýde
Qazaq ulttyq qyzdar pedagogıkalyq ýnıversıtetine tıesili jer ýchaskesin ıemdenip, satyp jiberdi degen kúdikpen birqatar laýazymdy tulǵa ustaldy, dep habarlaıdy Almaty-akshamy.kz QazAqparat saıtyna silteme jasap.
«Almaty oblysy boıynsha Sybaılas jemqorlyqqa qarsy qyzmet Qazaq ulttyq qyzdar pedagogıkalyq ýnıversıtetiniń burynǵy qyzmetkerin, «Almaty oblysy boıynsha azamattarǵa arnalǵan úkimet» KEAQ fılıaly Qarasaı aýdandyq tirkeý jáne jer kadastry bóliminiń, Qarasaı aýdany ákimdiginiń jer qatynastary bóliminiń basshylaryn 2018 jyly Kemertoǵan kentinde ornalasqan aýdany 9,0 ga jer ýchaskesi túrindegi ýnıversıtettiń múlkin urlady degen kúdikpen ustady», - delingen habarlamada.
Málim etilgendeı, ýnıversıtettiń jer ýchaskesi birqatar ýchaskelerge zańsyz bólingen jáne ustalǵan tulǵalarǵa jalǵan qujattar arqyly úlestes bolyp rásimdelgen. Al keıinnen adal nıetti satyp alýshylarǵa satylǵan.
«Osy tulǵalar 2021 jyldyń qańtarynda qylmys izderin jasyrý jáne jer ýchaskesin ýnıversıtet balansyna jalǵan qaıtarý maqsatynda memlekettiń jer qorynan quqyq belgileıtin qujattarsyz sanıtarlyq aımaqtaǵy jáne jeke menshikke berýge jatpaıtyn Kóldi kentinde ornalasqan jer ýchaskesin zańsyz bólgen. Búgingi tańda barlyq kúdiktilerge sottyń sanksıasymen bultartpaý sharasy taǵaıyndaldy. Tergeý jalǵasýda, jasalǵan qylmysqa qatysy bar basqa adamdardy anyqtaý maqsatynda qajetti tergeý sharalary júrgizilýde», - dedi vedomstvodan.