Qazaqstandyq dızaıner ulttyq kıimderimizdi álemdik sahnalarda tanystyryp júr

Eýropa men AQSH-ta ulttyq úlgidegi kıimderge tapsyrys berýshiler kóp

Aqtóbelik dızaıner Malıka Dúısenbaeva «Qazaqstannyń 100 jańa esimi» jobasynda mádenıet jáne sport atalymy boıynsha jeńimpaz atandy, dep habarlaıdy Almaty-akshamy.kz

Ulttyq stıldegi kıim dızaıneri ári on saýsaǵynan óner tógilgen tiginshi osy jalpyulttyq jobada baq synamas buryn qazaqtyń oıýly-sándi ulttyq kıimderin álemdik sahnalarda tanystyryp, birneshe ret respýblıkalyq, halyqaralyq sán baıqaýlarynyń júldegeri atanǵan. Malıkanyń qolynan shyqqan boıjetkenderge arnalǵan ulttyq naqyshtaǵy zamanaýı dızaınmen qabysqan ádemi kóılekter álemge jaqsy tarap jatyr, 

Búginde Eýropa elderinde, AQSH-ta turatyn qazaqtar Malıkaǵa jıi tap­­syrys beredi. 

«Bizdiń qyzdar birin-biri qaıta­la­maıtyn, sándi jáne sapaly, bire­geı buıym jasaýǵa tyrysady. Boı­jetkender kóıleginiń matasy men jibi­nen bastap, pishýi men tigýine erekshe mán beremiz. Biregeı buıymdy jasaý ýaqyt pen erekshe talǵamdy qajet etedi. Sol úshin de ulttyq kıimniń ajaryn erekshe ashatyn oıý-órnekterine óte muqıat qaraımyz degennen góri, fılosofıalyq turǵydan qaraımyz desem, artyq aıtqandyq emes. Biz ulttyq oıý-órnekterimizdiń ejeldegi qoldanys aıasyn, tabıǵatyn zerttep baryp qana iske kirisemiz», - deıdi sheber.

Qazaqtyń oıý-órnekterin kıim­derge qoldaný úlken talǵamdy qa­jet etedi. Sol úshin de Malıka Qy­taıǵa birneshe ret baryp, qazaqtar ty­ǵyz qonystanǵan ólkelerdegi is­mer­lerden sheberlik sabaqtaryn úırenip keledi. Óıtkeni, ókinishke qaraı, biz áldeqashan umytqan ulttyq muralarymyzdy, dástúrimizdi úzbeı jalǵastyryp kele jatqan kisiler ol jaqta kóp.

Malıka qazir óńirlerdi aralap, kıim dızaıny jóninde semınarlar ótkizip júr. Sebebi naryqqa ulttyq kıimder úlgisin usyný – bir jaǵynan óner bolsa, ekinshi jaǵynan – bıznes. Kıimdi tige bilýmen qatar, ony ótkize bilý de úlken sheberlik pen tynymsyz eńbekti qajet etedi.

Búginde Nur-Sultan, Aqtóbe, Qy­zyl­­orda qalalarynda Malıkanyń ult­tyq kıim ortalyqtary ashylǵan. Oǵan qosa, pandemıa kezinde tigin­shi­lik­tiń onlaın mektebin ashty. Únemi ty­nym­syz izdeniste júretin ol bir ká­sip­tiń qyr-syryn tereń meńgerý tó­zim­dilik pen ýaqytty qajet etetinin aıtady.

Malıka Dúısenbaevanyń oıynsha, qazaqtyń birneshe myń jyldan beri jalǵasyp kele jatqan ulttyq kıimderi paraqtary tutas ashylmaǵan oqýlyq tárizdi. Ol bolashaq urpaq ata-babalarynyń, ata-ájeleriniń ulttyq kıimderin bizge qaraǵanda tereńirek baǵalaıdy degen senimde.