Búgin Nú-Delıde jaýyn seldetip, shaharda kólik qozǵalysy qıyndady. Ushaqtar da ushpady. Biraq birazdan beri ystyqtan zarezap bolǵan turǵyndary nóserdiń quıǵanyn rıza. Al Assam shtatynda shelektep quıǵan jańbyr sońy tasqynǵa ulasyp, 18 adam kóz jumdy. 800 myńnan asa turǵyn baspanasynan aıyryldy. Aımaqtyń 31 okrýgindegi egistik alqaptar solyp qaldy, dep habarlaıdy Almaty-akshamy.kz 24.kz-ke silteme jasap.
Datta Senapatı, turǵyn:- Sý aıaq astynan tasyp, qolymyzǵa ilingen dúnıe-múlkimizdi ǵana alyp shyqtyq. Qalǵany sý astynda qaldy. Tamaq joq qarnymyz ash. Ne isteıtinimizdi bilmeımiz.
Bangladeshte tasqynnan ondaǵan myń adam baspanasyz qaldy
Úndistanǵa kórshi Bangladeshtiń Sılhet aımaǵynda da jaýyn seldetip, kóp eldi mekendi sý basyp jatyr. Júzden astam tas joldy sý buzyp, ondaǵan aýdan bólinip qaldy. Myńdaǵan adam baspanasynan aıyryldy. Óńirdiń ınfraqurylymyna orasan zor shyǵyn kelgen. Sý áli qaıtpaǵandyqtan apatty aýdandarǵa kómek jetkizý qıynǵa soǵyp otyr.
- Aýylymyz eńiste ornalasqandyqtan tasqynnan qatty zardap shektik. Úılerimiz qırap, egistigimizdiń bárin shaıyp ketti.
AQSH: elde joq ystyq
Al AQSH-tyń soltústik-shyǵysynda kún ádettegiden áldeqaıda ysyp ketti. Vashıngtonnan bastap Nú-Iorkke deıin ondaǵan qalada synap baǵanasy 35 gradýstan asqan. Turǵyndar ystyqtan qashyp, kóleńke tappaı júr. Keıbireýler tipti sý burqaqtarǵa shomylyp máz.
- Kún óte ystyq. Meniń oıymsha 38 gradýs shyǵar. Shyjyǵan kúnnen biraz salqyndaıyq dep balalarymdy alyp akvaparkke keldim. Qolymdaǵy plasmas shólmekti aanda-sanda basyma qoıyp salqyndaýǵa májbúrmin.
Brazılıada qar jaýdy
Brazılıanyń ońtústiginde ótken aptada kún sýytyp, Santa-Katarına shtatynda synap baǵanasy mınýs 5 gradýsqa deıin tómendedi. Keı jerlerde qar jaýdy. Mektepter men ýnıversıtetter jabylǵan. Mamandar ótken aptada bastalǵan sýyq áli de birneshe kúnge sozylatynyn aıtady.
Fabıý Santos, Rıo-de-Janeıro turǵyny:
- Qazir ádetten tys erekshe sýyq bolyp tur. Bala kezimde bul aımaqta kúnniń sýytýy sırek kezdesetin. Al qazir mundaı aýa raıy jıiledi.
Kanadada tornado oıran saldy
Kanadanyń Ontarıo provınsıasynda tornado oıran saldy. Tabıǵat apatynan 2 adam kóz jumdy. Taǵy birnesheýi jaraqat aldy. Dúleı jel taldardy tamyrymen qoparyp, elektr baǵanalaryn qulatty. Provınsıanyń 300 myńnan asa turǵyny jaryqsyz qaldy.