Dombyrada án aıtylyp, halyq ánderi oryndaldy
Kaýnas qalasyndaǵy Uly Vıtovt ýnıversıtetiniń úlken zalynda Qazaqstan men Lıtva arasyndaǵy dıplomatıalyq qarym-qatynastardyń ornaǵanyna 30 jyl tolýyna oraı QR Elshiligi Ahmet Baıtursynulynyń 150 jyldyǵyna jáne Roza Baǵlanovanyń 100 jyldyǵyna arnalǵan saltanatty kesh ótkizdi, dep habarlaıdy Almaty-akshamy.kz SİM baspasóz qyzmetine silteme jasap.
İs-sharaǵa Seım depýtattary, qala merıasynyń, iskerlik jáne qoǵamdyq toptardyń ókilderi, sondaı-aq qazaqstandyq stýdentter qatysty.
QR Qurmetti konsýly Albertas Mılınıs kesh qonaqtaryn mereıtoılary IýNESKO-nyń este qalarlyq datalardyń halyqaralyq kúntizbesine engen qazaq halqynyń kórnekti ókilderi – Ahmet Baıtursynuly men Roza Baǵlanovanyń ómiri men shyǵarmashylyǵymen tanystyrdy.
Merekelik konsertte qazaqstandyq ártis Gúlnıza Jumajanova dombyrada qazaqtyń halyq ánderin, onyń ishinde Roza Baǵlanovanyń repertýaryndaǵy shyǵarmalardy oryndady.
Saltanatty kesh aıasynda qazaqstandyq dıplomattar Qazaqstan-Lıtva yntymaqtastyǵynyń otyz jyldaǵy jetistikteri, sondaı-aq elimizde júrgizilip jatqan saıası jáne ekonomıkalyq reformalar týraly aıtyp berdi.
Seımniń Ekonomıka jónindegi komıtetiniń tóraǵasy Kazıs Starkávıchús óz sózinde eki eldiń saýda-ekonomıkalyq jáne mádenı-gýmanıtarlyq salalardaǵy ózara is-qımylynyń joǵary deńgeıin atap ótti
Kesh qonaqtary Qazaqstan týraly kóbirek bilýge múmkindik bergen is-sharany uıymdastyrǵany jáne ótkizgeni úshin alǵystaryn bildirdi.
Kóptegen sáýlet eskertkishteri men kóptegen murajaılarymen tanymal Lıtvanyń burynǵy astanasy jáne ekinshi iri qalasy – Kaýnas qalasy 2022 jyly Eýropanyń mádenı astanasy dep atalý quqyǵyna ıe boldy. Jyl ishinde munda 40-qa jýyq festıvál, 60-tan astam kórme, 250 oryndaýshylyq óner jáne 250-den astam konsert ótedi. 2023 jyly mádenı astanasy majar Vesprem, al 2024 jyly eston Tartý jáne norvegıalyq Bodo bolady.