Pılottyq joba aıasynda
Qazaqstandyq mamandar pılottyq joba aıasynda múgedektik tobyn belgileý úshin medısınalyq-áleýmettik saraptamany syrttaı júrgizdi, dep habarlaıdy Almaty-akshamy.kz.
Múgedektik tobyn belgileý úshin medısınalyq-áleýmettik saraptama júrgizýdiń syrttaı formaty boıynsha pılottyq joba aıasynda Qazaqstannyń barlyq óńirinen 18,8 myńnan astam ótinim qaraldy. Qazirgi ýaqytta jobaǵa 589 medısınalyq uıym qosylǵan.
«Pılottyq joba arqyly 2022 jyly múgedektikti belgileý boıynsha syrttaı qyzmet kórsetýdi 20%-ǵa deıin jetkizý josparlanǵan. Al qazir bul kórsetkishke qol jetkizildi, ıaǵnı múgedektigi bar adamdardan 18,8 myńnan astam ótinim kelip tústi, bul kýálandyrylǵan adamdardyń jalpy sanynyń 20,2%-y. Búginde biz osy qyzmetti proaktıvti túrde alǵan tulǵalar sanyn arttyrý boıynsha jumysty jalǵastyryp jatyrmyz», – dep habarlady QR Eńbek jáne halyqty áleýmettik qorǵaý vıse-mınıstri Erbol Ospanov.
Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardy qaǵazbastylyqtan aryltýdy, ınstansıalar boıynsha júrýin jáne qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy.
Osy tapsyrmany iske asyrý úshin QR Eńbek jáne halyqty áleýmettik qorǵaý mınıstrligi Densaýlyq saqtaý men sıfrlyq damý, ınovasıalar jáne aeroǵarysh ónerkásibi mınıstrlikterimen birlesip, Qazaqstannyń barlyq 17 óńirinde pılottyq rejımde medısınalyq-áleýmettik saraptama (budan ári – MÁS) júrgizýdiń syrttaı formaty boıynsha jobany iske qosty.
Múgedektik tobyn anyqtaý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi qajet, qalǵan prosester aqparattyq júıelerdi ıntegrasıalaý esebinen onyń qatysýynsyz ótedi.
Jalpy, syrttaı kýálandyrýǵa kóshý
- ákimshilik jáne búrokratıalyq kedergilerdi joıady;
- MÁS saraptamalyq sheshimderiniń ashyqtyǵyn qamtamasyz etedi;
- úıden shyqpaı-aq, múgedektikti belgileý jáne múgedektigi bar adamdardy áleýmettik qorǵaý sharalaryn aıqyndaý boıynsha qyzmetter alýǵa múmkindik beredi;
- kórsetiletin qyzmetti alýshynyń kórsetiletin qyzmetti berýshimen tikeleı baılanysyn boldyrmaıdy, osylaısha sybaılas jemqorlyq táýekelderin barynsha azaıtady.