Shymkenttik 18 jastaǵy stýdent Ulyqbek Ahmedov lombardqa telefon alý úshin kirip, kútpegen jerden naǵyz qaharmanǵa aınaldy.
«Maǵan telefonymdy qaıtaryp alý kerek boldy. Lombardtyń jumysy keshki 9-da aıaqtalatyndyqtan, asyǵyp jettim. Qyz-kassır qujattardy rettep jatqanda, artymnan bir jigit kirdi. Bastapqyda kezegin kútip otyrdy, biraq birden maǵan jaqyndap, kasırge tapansha kezep: “Bul tonaý, báriń tynysh turyńdar!” – dedi. Basynda ne bolyp jatqanyn túsinbeı, qaıta suradyq. Sol kezde ol aıqaılap, kasadaǵy aqshany talap ete bastady. Sol sátte men áreket etýge bel býdym», — dep esine aldy Ulyqbek.
Buryn boksshy bolǵan Ulyqbek jyldam áreket etip, qylmyskerdi bir soqqymen jerge qulatyp, tapanshasyn tartyp aldy. Shabýyldaýshyny polısıa kelgenge deıin ustap turǵan.
Ulyqbektiń anasy Rano bul oqıǵanyń jaı-japsaryn tek Shymkent qalalyq polısıa departamentine ulyn marapattaý úshin shaqyrylǵanda ǵana bilgenin aıtady. Kameradaǵy jazbany kórgende, oqıǵanyń sátti aıaqtalǵanyna qaramastan, qorqynyshyn jasyra almaǵan. Degenmen, ol ulymen, ásirese onyń eń kenjesi ekenin atap ótip, maqtanysh sezimin bildirdi.
Ulyqbek bolashaqqa úlken jaýapkershilikpen qaraıdy: ol oqýyn jumysymen qatar alyp júrip, ata-anasyna qarjylaı táýeldi bolmaýǵa tyrysady. Qazirgi ýaqytta dene shynyqtyrý mamandyǵy boıynsha bilim alyp jatyr, biraq bolashaqta polısıa qyzmetkeri bolýdy armandaıdy. Mundaı batyl jigitke quqyq qorǵaý organdarynda da oryn tabylary sózsiz.