Qazaqstan tenısi tarıhyndaǵy besinshi ATP týrnıri jáne Almatyda ótetin alǵashqy jarysqa daıyndyq qalaı júrip jatyr? Bul týraly QTF materıalynda baıandalady.
Kópfýnksıonaldy Almaty Arena kesheni álemniń eń myqty tenısshilerin qabyldaýǵa tolyqtaı daıyn. Ortalyq kortta jekeleı jáne juptyq razrádtarda 30 mach ótedi dep josparlanǵan. Al №1 kortta taǵy 24 mach oınatylady.
Almaty Arena arnaıy tenıs arenasy bolmasa da, týrnırdi uıymdastyrýshylar sport keshenin barynsha qysqa merzimde tenıs úshin tolyq beıimdedi.
Negizgi arenanyń trıbýnalary 6 myń kórermenge arnalǵan, al qosymsha arenada 1 myń kórermendi qabyldaı alady. Sport kesheniniń syrtynda 3 jattyǵý kortyna arnalǵan ýaqytsha qurylym salynǵan.
Uıymdastyrý komıteti Almaty Open týrnıriniń bolashaqta damý múmkindikterin joǵary baǵalap otyr. Osyǵan baılanysty álemdik tájirıbege súıenip, tenıs týrnırlerin úlken mýltısporttyq arenalarda ótkizýdi josparlap otyr. Mundaı tásil "Úlken dýlyǵa" jáne Masters serıasyndaǵy birneshe týrnırlerdi qospaǵanda. álemdik týrnırlerdiń shamamen 70%-ynda qoldanylady.
ATP 250 Almaty Open týrnıri úshin jalpy aýdany 2 myń sharshy metrden asatyn úsh jattyǵý korty jáne shamamen 1700 sharshy metrdi quraıtyn eki oıyn korty tóseldi.
- Korttar erekshe faneradan, patenttelgen tehnologıamen jasalǵan.
- Bul korttar Halyqaralyq tenıs federasıasy (ITF), ATP jáne WTA tarapynan sertıfıkattalǵan.
- Korty Vengrıadan Rebound Sport kft kompanıasy jetkizdi.
- Bul kompanıa Eýropadaǵy halyqaralyq týrnırlerge arnalǵan tenıs jabyndarymen aınalysady.
- Korttar portatıvti panelderden qurastyrylady.
- Bir korttyń salmaǵy shamamen 15 tonnany quraıdy jáne ony tasymaldaý úshin bir fýra qajet.
- Ortalyq kort 361 panelden turady.
Almaty Open týrnıri: Jýrnalıser men kórermenderge arnalǵan sharalar
Medıa ortalyqta jýrnalıser úshin barlyq qajetti jaǵdaılar jasalǵan. Jumys isteýge arnalǵan bólmeler, baspasóz konferensıalary ótetin jalpy zal jáne kofe-breık aımaǵy qarastyrylǵan.
Almaty Arena aınalasyndaǵy aýmaq týrnır kezindegi eń tanymal orynǵa aınalady. Munda turaqty túrde "Tenıs festıvali" uıymdastyrylady, ol mýzyka, túrli tenıs saıystary: "Dál soqqy", "Tenıs dartsy" sıaqty oıyndardy qamtıdy. Sonymen qatar, týrnırge arnalǵan brendtik kıimder men merchendaızıng ónimderiniń satylymy, júldeler utysy, eń kishkentaı kórermender men jasóspirimderge arnalǵan "Kıds zonasy", amfıteatr sahnasy, týrnır machtaryn kórýge arnalǵan úlken ekran jáne fotozona ornatylady. Áýe shary, fýd-korttar, demeýshiler men seriktesterdiń kórmeleri de kelýshilerdi beı-jaı qaldyrmasy anyq.
Bul sharalar Almaty Open týrnırin tek sporttyq jarys qana emes, jan-jaqty mádenı jáne oıyn-saýyqtyq is-sharaǵa aınaldyrýǵa baǵyttalǵan.
Almaty Open týrnıriniń translásıasy álemniń 40-tan astam elinde kórsetiledi
Almaty Open týrnıriniń translásıalary 40-tan astam elde kórsetiletin bolady. Teledıdar arqyly týrnırdi shamamen 3 mıllıon kórermen tamashalaıdy, al áleýmettik jeliler, strımıng jáne basqa platformalar arqyly jalpy 8,5 mıllıon adam tamashalaıdy.
Qazaqstan aýmaǵynda machtardyń tikeleı translásıalary Qazaqstan Tenıs federasıasynyń resmı saıtynda – ktf.kz, sondaı-aq, Qazsport jáne Insport sporttyq telearnalarynda kórsetiledi.
Týrnır jazbalaryn 31 arna, Sport Plus Qazaqstan jáne Almaty TV arnalarynan tamashalaýǵa bolady.
Týrnır machtaryna bıletterdi ticketon.kz jáne almaty-arena.kz saıttarynan onlaın satyp alýǵa bolady. Bıletterdiń baǵasy 3000 teńgeden bastalady.
ATP 250 Almaty Open týrnıri 13-20 qazan aralyǵynda ótedi. Jerebe 12 qazanda Shymbulaqta ótedi.