Alǵash Úndistanda shyǵyp, Tumandy Albıonda taraı bastaǵan "arktýrdyń" juǵý qaýpi joǵary - mamandar.
Buǵan qosa, ol antıdenelerge óte tózimdi bolyp keledi eken. Úndistanda Arktýrdy juqtyrǵandardyń sany 60 myńnan asyp otyr. Densaýlyq saqtaý salasyna basshylyq etetin sheneýnikter jaǵdaıdy ýshyqtyryp almaý úshin eldiń keıbir shtattarynda maska taǵýdy mindettedi, dep habarlaıdy Almaty-akshamy.kz 24.kz-ke silteme jasap.
Vırýs alǵash qańtar aıynda anyqtalǵanymen, álem boıynsha endi ǵana keńinen taraı bastady. Dúnıejúzilik densaýlyq saqtaý uıymyndaǵylar jaǵdaıdy jiti qadaǵalap otyrmyz deıdi. Ulybrıtanıada ázirge "arktýrdy" juqtyrǵandar kóp emes. Tumandy Albıonda turǵyndardyń basym kópshiligi kovıdke qarsy vaksına saldyrǵanyna qaramastan, vırýsologtar jaǵdaı kúrdelenip ketýi múmkin dep alańdaýshylyq bildirip otyr. Óıtkeni jańa vırýstyń antıdenelerge tózimdiligi óte joǵary eken. Sondyqtan sarapshylar betperde kıý artyq etpeıdi deıdi.
«Brıtanıalyqtar saqtyq sharalary týraly umytqan syńaıly. Bizge, shynymen de, aýany súzgiden ótkizetin tıisti maskalar taǵý kerek. Bólmelerdegi aýanyń sapasyn jaqsartyp, jeldetip otyrý kerek», - deıdi Lıds ýnıversıteteniń profesory, vırýsolog Stıven Grıffın.
Tynys alýdyń qıyndaýy jáne jótel sıaqty kovıdtiń negizgi belgileri jańa vırýsta da bar. Biraq oǵan endi keıbir balalar arasynda konúnktıvıt, ıaǵnı kózdiń bylshyqtanýy sıaqty sımptomdar qosylyp otyr.
«Jańa nusqanyń paıda bolýy bizge vırýstyń áli eshqaıda joǵalyp ketpegenin jáne bıologıasy áli tiri ekenin anyq kórsetedi. "Arktýr" aǵzanyń ımmýnologıalyq qorǵanysynyń keıbir bólikterin aınalyp ótýge qabiletti jáne jaqyn arada búkil álemge taralýy múmkin», - deıdi Ekseter ýnıversıtetiniń juqpaly aýrýlar boıynsha aǵa oqytýshysy Bharat Pankhanıa.
Vırýs ázirge Sıngapýr, Avstralıa jáne AQSH sıaqty 22 elde anyqtaldy. Ulybrıtanıada Arktýrdy juqtyrǵandardyń sany 50-ge jýyq. Aýyrýdyń asqynǵany týraly ázirge derek joq. Jańa shtamdy tereńinen zertteý ǵalymdarǵa qıyn bolyp otyr. Óıtkeni Ulttyq statısıka qyzmeti koronavırýs týraly aqparat jınaýdy toqtatqan. Genomdyq qadaǵalaý júrgizilmeı keledi. Al derektiń azydyǵy ǵalymdardyń qyraǵylyǵyn azaıtady deıdi mamandar.