«Uly Abylaı han – tańdaýly derekter úzindisi» qoıylymy sahnalandy
Uly tulǵalar esimi umyt bolmaýy tıis. Urpaǵy únemi eske alyp otyrǵany abzal. Halqymyz «árýaq razy bolmaı, tiri baıymaıdy» deıdi. Osy oraıda Almatyda «Transforma» shyǵarmashylyq jastardyń kópsalaly mádenı keńistik alańynda qazaqtyń uly bıleýshisi Abylaı hannyń ómirine baılanysty sahnada qoıylymy qoıyldy.
Babalar esimin ulyqtaǵan qoıylym Almaty qalasy Qoǵamdyq damý basqarmasynyń Qoǵamdyq damý ortalyǵynyń uıymdastyrýmen ótti. İs-shara egemendiktiń nyshany Respýblıka kúni qarsańynda uıymdastyryldy.
Uly Abylaı han esimi bárimiz úlgi alatyndaı saıası tulǵa. Qazaq handyǵynyń toqyraý jyldarynda el tizginin qolǵa alǵan ol memlekettilikti nyǵaıtty. Batyl syrtqy saıasatty júzege asyryp, el birligin saqtaýǵa bar kúsh-jigerin saldy. Saıasatkerdiń dıplomatıalyq qabileti eldiń soltústigindegi alyp el Patshalyq Reseı men shyǵystaǵy Sın elimen terezesi teń saıasat júrgizýge múmkindik berdi.
Ol kezeńde Qazaq handyǵynyń ishki saıası jaǵdaıy da máz emes edi. Bir ortalyqqa baǵyný sıaqty qundylyq joǵala bastaǵan. Ár sultan bas-basyna bı bolǵan zaman. Sondaı qıly zamanda el tizginin ustaǵan tulǵa esimi ásirese jastar arasynda dáriptelýi tıis. Bul turǵydan alar bolsaq is-sharanyń óz maqsatyna jetkenine kózimiz jetti. Sebebi, qoıylymdy kórýge kelgen jastardyń sany kóp, tipti oryn jetpeı túregep turyp qaraýǵa týra keldi. Qoıylymdy tamashalaýǵa kelgen jastar rýhanı azyq aldy.
Qoıylym Qurmanǵazy atyndaǵy Qazaq ulttyq konservatorıasy, Temirbek Júrgenov atyndaǵy Qazaq ulttyq óner akademıasy, Júsipbek Elebekov atyndaǵy Respýblıkalyq estradalyq-sırk koleji sıaqty qalamyzdaǵy shyǵarmashylyq oqý oryndarynyń stýdentteriniń qatysýymen sahnalandy.