Barlyq tólemderdi 14 362 adam aldy
Búgin, 6 mamyrda, Almatyda Uly Otan soǵysyndaǵy Jeńistiń 77 jyldyǵyna oraı qalanyń barlyq ardagerleri 1 mln teńge kóleminde birrettik tólem aldy. Búginde Almatyda 75 ardager (UOS) turyp jatyr, dep habarlaıdy Almaty-akshamy.kz.
Uly Otan soǵysynyń ardagerlerine teńestirilgen 1592 turǵynǵa jáne basqa memleketter aýmaǵyndaǵy urys qımyldarynyń 2870 ardagerine 100 myń teńge mólsherinde birrettik materıaldyq kómek kórsetildi.
Jeńis kúnine oraı tólem alýshylar tizimine soǵys kezinde tyldaǵy qajyrly eńbegi úshin ordendermen jáne medaldarmen marapattalǵan 9370 tyl eńbekkeri, sondaı-aq Uly Otan soǵysy ardagerleriniń 455 jesiri kirdi. Olar úshin birrettik materıaldyq kómek mólsheri 50 myń teńgeni qurady.
Jeńis kúnine oraı materıaldyq kómek Almaty qalasynyń ákimdigi bekitken tizimder boıynsha ótinishter talap etilmeı tólendi. Barlyq tólemderdi 14 362 adam aldy.
Eske salsaq, Almaty ákimi Erbolat Dosaevtyń usynysy boıynsha Uly Otan soǵysynyń ardagerleri úshin birjolǵy tólem somasy eki esege – 500 myń teńgeden 1 mln teńgege deıin ulǵaıtyldy. Osydan soń máslıhat depýtattary Almaty qalasy máslıhatynyń kezekten tys XVIII sesıasynda qala basshysynyń usynysyn qoldady.