Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde aldaǵy mańyzdy tarıhı data – Uly Jeńistiń 80 jyldyǵyna toqtalyp, bul oqıǵanyń búgingi halyqaralyq ahýal úshin de ózekti taǵylymy bar ekenin erekshe atap ótti. Bul týraly Aqshamnews.kz saıty habarlaıdy.
Prezıdenttiń aıtýynsha, arada segiz onjyldyq ótse de, 1945 jylǵy Jeńistiń rýhy – ult pen ulystardyń yntymaǵy men adamzattyń beıbit ómirge degen umtylysynyń nyshany bolyp qala beredi.
"Eki aptadan keıin álemdik mańyzy bar tarıhı oqıǵa – Uly Jeńiske 80 jyl tolady. Biz bul mereıtoıdy keń kólemde atap ótemiz. Qazaqstannyń maıdangerleri men tyl eńbekkerleri – barsha halqymyz Otan úshin otqa tústi", – dedi Toqaev.
Ol Jeńis kúniniń taǵylymy – ásirese qazirgi álemdegi geosaıası shıelenister men turaqsyzdyq jaǵdaıynda – erekshe mańyzdy ekenin basa aıtty.
"Uly Jeńistiń taǵylymy barsha halyqqa, ásirese, saıasatkerlerge ksenofobıaǵa, násildik jáne ulttyq ústemdikke, halyqaralyq quqyq qaǵıdattaryn qurmettemeýge qurylǵan jaýapkershilikten jurdaı saıasattyń saldary qandaı qasiretke ákeletinin áli kúnge deıin kórsetip otyr", – dedi Memleket basshysy.
Prezıdent qazirgi álemdik tártiptiń senim daǵdarysyn bastan keshirip jatqanyn atap ótti. Ásirese, halyqaralyq quqyq normalarynyń álsireýi men halyqaralyq uıymdardyń bedeliniń tómendeýi alańdaýshylyq týdyratynyn jetkizdi.
"Dúnıe júzi senim daǵdarysymen betpe-bet kelgen shaqta ekstremıstik ıdeologıanyń oralýy, popýlızm men talas-tartystyń órshýi, halyqaralyq quqyqtyń qunsyzdanýy, negizgi halyqaralyq ınstıtýttardyń álsireýi baıqalady", – dedi Toqaev.
Ol Qazaqstannyń bul úderisterge qarsy turýda aıqyn ustanym ustanyp otyrǵanyn, halyqaralyq beıbitshilik pen qaýipsizdiktiń kepili retinde BUU-ny reformalaý men qoldaýdy belsendi túrde usynyp kele jatqanyn atap ótti.
"Qazaqstan BUU Jarǵysyn qatań ustanýdy, Uıymdy reformalaýdy dáıekti túrde usynyp keledi. Qazirgi jaǵdaıda BUU balamasy joq ǵalamdyq uıym bolyp qala beredi. Sondyqtan biz BUU-ny qoldaımyz", – dep túıindedi Prezıdent.