Búkil álem úshin syndarly dıalog pen pragmatızm – basty qundylyqtarǵa aınalýy tıis
Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda halyqaralyq turaqsyzdyq jaǵdaıynda syndarly dıalogtyń mańyzy men Qazaqstannyń strategıalyq baǵyty týraly oı qozǵap, álemdik qaýymdastyqty kelisim men ózara qurmetke negizdelgen áreketke shaqyrdy. Bul týraly Aqshamnews.kz saıty habarlaıdy.
Prezıdent qazirgi kúrdeli geosaıası jaǵdaıda álemdik qaýymdastyq kelisim men ózara túsinistikke negizdelgen sheshimder qabyldaýǵa májbúr ekenin atap ótti.
"Berekesizdikke boı aldyrmaý úshin álemdik qaýymdastyq múddeler toǵysatyn tusty izdeýge, kúrdeli sheshimder qabyldaýǵa jáne amalsyz mámileler jasaýǵa májbúr bolady. Dıalog joq jerde, qarsylyq pen túsinispeýshilik týyndaıdy", – dedi Toqaev.
Onyń aıtýynsha, qazirgi syn-qaterlerge qarsy turýdyń jalǵyz joly – halyqaralyq yntymaqtastyqty kúsheıtý. Ózara táýeldi álemde ǵalamdyq máselelerdi jalǵyz sheshý múmkin emes.
"Qazirgi syn-qaterlerdi aýqymdy halyqaralyq yqpaldastyq arqyly ǵana jeńe alamyz dep senemin. Ózara bite qaınasqan álemde ǵalamdyq máselelerdi sheshýdiń budan basqa joly joq", – dep naqtylady Memleket basshysy.
Ádildik pen teńdikke negizdelgen kelissózder – beıbit álem kepili
Toqaev beıbit álem qurýda pragmatızm men ózara qurmet, ádilettilik pen eshkimdi alalamaý qaǵıdattarynyń erekshe mańyzǵa ıe ekenin atap ótti.
"Sondyqtan pragmatızm men ózara qurmetke, teńdikke, ádildikke, eshkimdi alalamaýǵa negizdelgen syndarly kelissózder men turaqty baılanystar halyqaralyq jaǵdaıdy ońaltyp, shıelenisterdiń túıinin tarqatady", – dedi ol.
Bul tujyrym – Qazaqstannyń beıbit syrtqy saıasatynyń negizi men álemdik turaqtylyqqa qosyp otyrǵan úlesiniń kórinisi.
Memleket basshysy ishki saıasatta da syrtqy jaǵdaıǵa beıimdele otyryp, naqty jáne uzaq merzimdi maqsattarǵa júıeli túrde umtylý qajet ekenin aıtty.
"Qazir búkil álemniń bolashaǵy bulyńǵyr bolyp tur. Osy almaǵaıyp zamanda strategıalyq baǵdarymyzǵa saı áreket etý – aldymyzda turǵan asa mańyzdy mindet", – dedi Toqaev.
Ol Qazaqstannyń qolǵa alǵan aýqymdy jobalardy jalǵastyratynyn, ınvestısıa tartý men ónerkásiptik áleýetti arttyrý baǵytynda naqty jumystar jalǵasatynyn jetkizdi.
"Uzaq merzimge arnalǵan maqsattarymyzǵa qol jetkizý úshin tıanaqty ári tıimdi jumys isteýimiz kerek", – dep qorytyndylady Prezıdent.