Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde kórshilik qarym-qatynas pen aımaqtyq turaqtylyqqa qatysty ustanymyn aıqyndap, qazaq halqynyń tatý kórshilik dástúrin qazirgi zamanǵy dıplomatıalyq saıasatpen sabaqtastyra bildi. Bul týraly Aqshamnews.kz saıty habarlaıdy.
Memleket basshysy qazaq halqynyń dástúrli qundylyqtarynyń biri – kórshimen tatý turý ekenin atap ótti. Bul uǵym tek salt-dástúrde emes, dinimizde de bekitilgen qaǵıda retinde sıpattaldy.
"Qazaq qashanda kórshisin qadirleı bilgen. Qýanyshta da, qıyndyqta da kórshisine súıengen, kórshiniń qasynan tabylǵan. ‘Kórshi aqysy – táńir haqysy’ degen uǵym dinimizde jáne dástúrimizde bar. Bul – bizge atadan qalǵan ósıet, anadan berilgen qasıet", – dedi Toqaev.
Ol qazirgi tańda da bul dástúrdiń jalǵasyp kele jatqanyn, kópultty qoǵamymyzda ártúrli etnos ókilderiniń beıbit qatar ómir súrip jatqanyn mysalǵa keltirdi.
Prezıdent Qazaqstannyń kórshi eldermen tatý, syndarly, baýyrlastyq negizdegi baılanysyn joǵary baǵalap, bul baǵytta eshqandaı túıtkildi másele joq ekenin basa aıtty.
"Reseı – Qazaqstannyń burynnan kele jatqan negizgi strategıalyq seriktesi ári senimdi odaqtasy. Qytaı elimen yqpaldastyq tamyry da tereńde jatyr. Qytaı halqy qazaq halqyna eshqashan zıan keltirgen joq, bolashaqta da zıan keltirmeıdi", – dedi Memleket basshysy.
Sonymen qatar, Qyrǵyzstan, Ózbekstan, Túrikmenstan jáne Ázerbaıjanmen aradaǵy rýhanı, tarıhı baýyrlastyqqa toqtalyp, bul eldermen yntymaqtastyqtyń senim men syılastyqqa negizdelgenin jetkizdi.
"Alataýdy teń jaılaǵan qyrǵyzdar – bir týǵan baýyrlarymyz. Ejelden enshiles ózbek aǵaıyndy óz aǵam dep qadir tutamyz. Túrikmenderdi týys sanap, shyn júrekten qurmetteımiz. Qart Kaspııdiń jaǵasyndaǵy ázerbaıjan eline degen yqylasymyz da erekshe", – dedi Toqaev.
Prezıdent Qazaqstan men Reseı arasyndaǵy qurlyqtaǵy eń uzyn shekaranyń beıbit túrde shegendelýin erekshe mysal retinde atap ótti. Sonymen qatar, Ortalyq Azıadaǵy memleketterdiń de shekara máseleleri boıynsha tarıhı sheshimderge qol jetkizgenin qýanyshpen jetkizdi.
"Qyrǵyzstan, Ózbekstan jáne Tájikstan uzaq jyl boıy sheshimin tappaǵan shekara máselesi boıynsha ortaq mámilege kelip, tarıhı kelisimge qol qoıdy dep aıtýǵa bolady. Biz baýyrlas elder úshin qýanamyz, olardy árdaıym qoldaımyz", – dedi ol.