Baıqaýǵa 20-45 jas aralyǵyndaǵy avtorlar qatysa alady.
«AMANAT» partıasy dástúrli «Uly dala» respýblıkalyq shyǵarmashylyq baıqaýynyń bastalǵanyn málimdedi, dep habarlaıdy aqshamnews.kz
Bıyl ádebı konkýrs kórnekti jazýshy, balalar ádebıetiniń klassıgi Berdibek Soqpaqbaevtyń 100 jyldyq mereıtoıy aıasynda ótedi.
Partıanyń «Ulttyq mura» jobasy aıasynda Jazýshylar odaǵymen birlesip ótkizip kele jatqan «Uly dala» respýblıkalyq shyǵarmashylyq baıqaýy osymen besinshi ret uıymdastyrylýda.
Shyǵarmashylyq dodanyń basty maqsaty – ulttyq bolmysty, rýhanı qundylyqtardy pash etetin, kreatıvti ıdeıalarǵa ıe jas qalamgerlerge, otandyq avtorlarǵa qoldaý kórsetý jáne shyǵarmalaryn nasıhattaý. Sonymen qatar balalar ádebıetiniń báıteregi Berdibek Soqpaqbaevtyń shyǵarmalaryndaǵy taǵylymdy oılar men eskirmes obrazdardy óskeleń urpaqqa dáripteý.
Baıqaýǵa úmitkerler:
«Proza»,
«Poezıa»,
«Dramatýrgıa»,
«Ádebı syn» jáne
«Balalarǵa arnalǵan shyǵarma» nomınasıalary boıynsha qatysa alady.
Budan bólek, baıqaýda «Berdibek Soqpaqbaevtyń 100 jyldyǵy» jáne «Alash amanaty» arnaıy júldeleri de qarastyrylǵan. Sonymen qatar Alash qaıratkerleri İ.Jansúgirov, S.Seıfýllın, B.Maılınniń týǵanyna 130 jyl tolýyna oraı «Úsh báıterek» arnaıy júldesi taǵaıyndalyp otyr.