2-3 qyrkúıekte Almaty qalasyndaǵy «Boraldaı» saq qorǵandarynda «Uly dala – kóshpendiler álemi» Halyqaralyq etnofestıvali ótedi.
Qala kúnine oraılastyrylǵan festıvál «Almaty – Shanhaı yntymaqtastyq uıymynyń mádenı jáne týrısik astanasy» jobasy aıasynda uıymdastyrylǵan, dep habarlaıdy Almaty-akshamy.kz.
Sharanyń basty maqsaty - kóshpendiler mádenıetin, ejelgi tarıhy men salt-dástúrin kórsetý. Festıválda kóshpendilerdiń jaýyngerlik oıyndary, saıatshylyǵy, at baptaýy, taǵamdary, qolóneri t.b kóptegen turmys-tirshiligi kórsetiledi. Sharaǵa jınalǵan halyq túrli saıystardy tamashalap, qyzyqty sheberlik sabaqtarǵa qatysyp, kóshpendilerdiń ótken dáýirine saıahat jasaıdy.
Festıválde Ázerbaıjan, Túrkıa, Majarstan (Vengrıa), Malaızıa, Bashqurtstan, Daǵystan, Chývashıa, Altaı, Býrátıa, Ózbekstan jáne Qyrǵyzstan syndy 10 nan astam memleketten jınalǵan eń myqty etnomýzykanttar men sportshylar óner kórsetedi.
«Uly dala – kóshpendiler álemi» Halyqaralyq festıvalinde 50-ge jýyq kıiz tigiledi. Kókpar, qyz qýý. aýdaryspaq, teńge ilý, jamby atý, asaýǵa quryq salý, asaýdy úıretý, túıe baý, bıe baý, naıza shanshý, sadaq atýdy úırený, jún sabaý, urshyq ıirý, kıiz, tekemet basý, alasha, kilem, shı, keste toqý, zergerlik t.b. buıymdar jasaý jáne sheberlik sabaqtary sekildi ulttyq oıyndar uıymdastyrylady. Sonymen qatar qazaqtyń ulttyq taǵamdary da festıvál barysynda jurtshylyq nazaryna usynylady.
Festıvál sońynda saıatshylardyń shoý baǵdarlamalary, ártúrli memleketterdiń jaýyngerlik oıyndar kórsetilimi, sheteldik jáne Qazaqtandyq etnotoptar konserti (Ulytaý, HasSaq) qoıylady.
Turǵyndardy festıvál aımaǵyna jetkizý jaǵy qarastyrylǵan. Ortalyq stadıon, N.Sas atyndaǵy teatr Shalápın- 22 (Altynsarın dańǵyly jaǵynan), "Alataý" dástúrli óner teatry (Momyshuly kóshesi jaǵynan), Almaty-1 temir joly (Avtoturaq) arnaıy kólikter qatynaıtyn bolady. Festıválge kirý tegin.
