«Jońǵar Alataýy» memlekettik ulttyq tabıǵı parkiniń aýmaǵyn 20 shaqty qar barysy meken etedi
Bul úsh jyl boıy fototuzaqtyń kómegimen júrgizilgen zertteý nátıjesinde belgili boldy. Beınejazba arqyly mamandar kózge sırek túsetin ilbistiń tirshilik etetin aýmaǵyn anyqtady, dep habarlaıdy Almaty-akshamy.kz 24.kz-ke silteme jasap.
Parktyń ǵylymı qyzmetkerleri jazda ornatqan qurylǵylaryn taý eteginen alyp qaıtty. Qar barysy adam aıaǵy baspaıtyn taýly aımaqta tirshilik etedi. Sondyqtan oǵan jetý ońaı emes. Park qyzmetkerlerimen birge birneshe saǵat jol júrip, bıik jartastar men qalyń qaraǵaıdy tamashalaı otyryp ilbistiń alǵash ret beınekameraǵa túsken jerine keldik. Taý taǵysyn zerttep júrgen Janarbek Moldahannyń fototuzaǵyna bul joly teke taspalanypty.
«Tekeler osy jerdi turaqty mekendeıdi. Tekelerdiń mekendeýi - bul barystardyń azyq qory. Teke bar jerde barys bar. Sondyqtan da bul jerdi zertteý jumystary jalǵastyryp, bir ǵana barys dep eseptemeı, birneshe barysty fototuzaqqa túsirý múmkindigimiz bolady dep esepteımin. Park aýmaǵyna 30-ǵa jýyq beınekamera ornatylǵan. Beınejazba arqyly qar barysy jaıly mol maǵlumat jınaldy», - deıdi «Jońǵar Alataýy» MUTP Aǵa ǵylymı qyzmetkeri Janarbek Moldahan.
Birneshe jyl boıy zertteý jumystaryn júrgizgen park qyzmetkerleri barystyń dál osy biz turǵan Sarqan jáne Aqshunaq shatqaldarynyń túıisken jerimen júretinin dáleldegen. Negizinen barys teńiz deńgeıinen 2500 metr bıiktiktegi taýly aımaqty mekendeıdi eken.
Asqar taýlardy kezip júrip qoıylǵan beınekameradaǵy jazbalar men fotolardy qyzmetkerler mekemege kelgen soń kompúterge kóshiredi. Mashaqaty men aýyrtpalyǵy mol jumys munymen bitpeıdi. Olar barystardy teńbili arqyly salystyryp, sanyn eseptep shyǵarady. Málimetter negizinde ǵylymı jumys ta jazylǵan.
«Iýrıı Aleksandrovıch Grachev degen kisiniń zertteýleri boıynsha, Jońǵar Alataýy, qazir Jetisý Alataýy deımiz, aýmaǵynda qyryq-elý barys mekendeıdi dep shyqqan. Jońǵar Alataýy parki Jetisý Alataýynyń úshten bir bóligin ǵana alyp jatyr. Sońǵy zertteý boıynsha, 15-20 barysty naqty park aýmaǵynan anyqtadyq. Kóp kezdesken aýmaqtary Tastaý, Arqankergen, Myńteke degen jerde turaqty kezdesedi», - deıdi «Jońǵar Alataýy» MUTP Aǵa ǵylymı qyzmetkeri Janarbek Moldahan.
Barys toptaspaı, jeke júretin, epti, aılaker, qaıratty ári óte qyraǵy ań. Sondyqtan kózge kóp túse bermeıdi. On jyldan asa qyzmet etken mamandardyń ózi ony bir ret qana kóripti. İlbiske qaraǵanda aıýdyń júrgen jerin tabý áldeqaıda ońaı, - deıdi olar. - Halqymyz barysty kıeli ańdardyń qataryna jatqyzady. Óıtkeni onyń bolmysy bólek. Ólekseni jemeı, ózi aýlaǵan janýardyń ǵana etimen qorektenedi. Budan basqa da qasıetteri jeterlik.