Ulttyq jáne at sporty túrleri ortalyǵy 2023-jyldyń qorytyndysy boıynsha aımaqtardyń reıtıńin jarıalady.
Bıyl ulttyq sportty janyna serik etkender 11 sport túrinen saıysqa tústi, dep habarlaıdy Almaty-akshamy.kz.
Jyl basynan bastap ulttyq sport túrinen jekelegen ishki chempıonattar, kýbok básekeleri, ulttyq sport festıvali, halyqaralyq jarystar men álemdik dodalar ótti.
Bir jyldyń qorytyndysy boıynsha 17 oblys pen 3 qalanyń arasynan Túrkistan oblysy úzdik atandy. Ońtústik sportshylary bıylǵy jarystarda jalpy sany 58 altyn, 52 kúmis, 65 qola júldemen kósh bastady. Onyń 13 altynyn túrkistandyqtar qazaq kúresinen enshilep, rekordtyq kórsetkishti tirkedi. Aımaq ókilderi ulttyq sporttyń damýyn júıeli jolǵa qoıǵan.
«Qazirgi tańda Túrkistan oblysynda 7 oblystyq, 23 aýdandyq jáne 7 qalalyq sport mekemelerinde ulttyq sport túrlerinen bólimsheler jumys isteıdi. Sonymen qatar oblystyq dene shynyqtyrý jáne sport basqarmasy sport mektepterindegi reglamenttiń saqtalýyn qadaǵalap, jattyqtyrýshylar men ádiskerlerge oqý-jattyǵý sabaqtaryna árdaıym ádistemelik kómek kórsetedi. 2023 jyly ulttyq sport túrlerinen jarys erejelerine ózgerister men tolyqtyrýlar engizildi. Atap aıtqanda aýdaryspaqtan buryn 8 salmaq dárejesinde jarys ótse, bıylǵy jyly 9 salmaq dárejesinde ótti, sondaı-aq, teńge ilý jáne jamby atý sportynan buryn 3 stıl boıynsha 1 ǵana sportshy qatysatyn, bıylǵy jyly 3 stılge 3 sportshy qatysa alatyn múmkindik týdy. Qatysýshylar sany kóbeıdi. Nátıjesinde sportshylarymyz tamasha óner kórsetip, elimizdegi ulttyq sport túrlerinen eń úzdik óńir ekenin dáleldep, jalpykomandalyq esepte 1-oryndy ıelendi», dep pikir bildirdi Túrkistan oblystyq dene shynyqtyrý jáne sport basqarmasynyń ókilderi.
QR Ulttyq jáne at sporty túrleri ortalyǵynyń baspasóz qyzmetiniń habary boıynsha bıylǵy reıtıńte ekinshi oryndy Astana qalasy ıelendi. Elordalyqtar bıylǵy jarystardan 24 altyn, 19 kúmis, 28 qola júlde enshiledi. Ásirese astanalyq dástúrli sadaq atýshylar aldyna jan salmady. Al úzdik úshtikti Shymkent qalasynyń sportshylar túıindedi. Megapolıs namysyn qorǵaǵan oǵlandar bıyl 24-altyn,19- kúmis, 20-qola jeńip alǵan. Bul aımaqta da qazaq kúresi jolǵa qoıylǵan. 24 altynnyń 11-i qazaq kúresiniń balýandaryna tıesili.
Ókinishke qaraı ulttyq sportty áli de damytýdy qajet etetin aımaqtar bar. Ásirese, Qostanaı, Ulytaý, Shyǵys Qazaqstan oblystarynyń nátıjeleri tómen.
«Sońǵy jyldary elimizde ulttyq sport qarqyndy damyp keledi. Onyń dáleli bıyldyń ózinde bizdiń sportshylar halyqaralyq arenalardaǵy jarystardan 35 altyn enshiledi. Qazir ortalyqqa qaraıtyn 11 sport túri bar. Árqaısysynyń damýy júıeli jolǵa qoıylǵan. Sonymen qatar olardy zamanaýı talaptarǵa saı qylý maqsatynda sońǵy úlgidegi tehnologıalardy da qosyp jatyrmyz. Biz jyl saıyn ulttyq sporttaǵy úzdik óńirlerdi anyqtap otyramyz. Ózderińiz biletindeı bul jaǵynan elimizdiń ońtústik aımaǵy alda tur. Ásirese Túrkistan oblysy ózgelerden kósh ilgeri. Munyń barlyǵy aımaqtaǵy sportqa jaýapty mamandardyń, sport basqarmasynyń júıeli jumysynyń arqasy. Sonymen qatar sońǵy jyldary elordamyz Astana qalasy qarqyndy damýdyń jolyna túsken. Bul óńirde asyq atý, toǵyzqumalaq, dástúrli sadaq atý, qusbegilik jáne qazaq kúresiniń ókilderi alda keledi. Degenmen at sportyna qatysty máseleler bar. Bul aldaǵy ýaqyttyń enshisinde sheshiletin dúnıe dep esepteımin. Buıyrsa barlyq nátıjeniń qorytyndysyn keler jyly ótetin Dúnıejúzilik kóshpendiler oıynynda kóremiz», deıdi ulttyq jáne at sporty túrleri ortalyǵynyń dırektory Baqdáýlet Sábıtov.
Ulttyq sporttyń bıylǵa josparlanǵan sharalary tolyǵymen aıaqtaldy. Endi aldaǵy jyldyń basynan bastap ár sport túrinen ishki birinshilikter uıymdastyrylady. Sonymen qatar ulttyq qurama músheleri halyqaralyq jarystarǵa qatysyp el namysyn qorǵaıdy. Eń mańyzdy dodada – keler jyly elordada 5-shi Dúnıejúzilik kóshpendiler oıyny ótedi.