Bızneske keltirilgen zalaldy óteý prosesi
Prezıdent Qasym-Jomart Toqaevtyń tapsyrmasy boıynsha bıznestiń zalalyn óteý tásilderi ázirlendi. Bul jumys «Atameken» UKP jáne bıznes ókilderimen tyǵyz ózara is-qımyl jasaı otyryp júrgizildi. Sondaı-aq, mehanızm birinshi vıse-premer Roman Sklárdyń tóraǵalyǵymen tártipsizdikter saldarynan bolǵan zardaptardy joıý jónindegi úkimettik komısıa otyrysynda aıtyldy, dep habarlaıdy Almaty-akshamy.kz.
Bızneske keltirilgen zalaldy óteý prosesi qalaı júrgiziledi?
1) kásipker óteý týraly ótinimdi qajetti qujattarmen qosa, InfoKazakhstan arqyly jiberedi. Ótinimge ESQ arqyly qol qoıylady.
2) ótinimdi óńirlik komısıa qaraıdy.
3) óńirlik komısıa zalaldy óteý somasyn memlekettik búdjetten bólý týraly sheshim shyǵarady.
4) qarjy memlekettik búdjetten zardap shekken kásipkerdiń paıdasyna aýdarylady.
Bul rette «Atameken» UKP úkimettik komısıa zalaldy óteý prosesi barynsha jedel oryndalady degen úmit bildiredi.
Óteýge tıesili soma qalaı esepteledi?
Óteý somasynyń esebi keltirilgen zalaldyń 3 túri:
1. jyljymaıtyn múlik (ǵımarattar men qurylystar);
2. búlingen jyljymaly múlik pen jabdyq;
3. urlanǵan taýarlar boıynsha júrgiziledi.
Búginde bıznes barynsha zalaldy óteý somasyn obektıv, rastalǵan jáne tez anyqtaıtyn ádisin talqylap jatyr.
Sondaı-aq, baǵalaýshylardyń jumys tártibi: merzimi, róli, áreket algorıtmi anyqtalady. Sońǵy kúnderi messendjerlerde «baǵalaý kompanıalary bul jumysqa tartylmaıtyny, sondyqtan olarǵa kásipkerlermen baǵalaý shartyn jasamaýǵa shaqyratyn» habarlama tarap jatyr. Mundaı jalǵan aqparatqa jol bermeýimiz kerek. Osy másele boıynsha Ádilet mınıstrligi men Ulttyq ekonomıka mınıstrliginen resmı pozısıany kútemiz.
Zalaldy óteý týraly sheshim qalaı shyǵarylady?
Jaqyn kúnderi QR premer-mınıstriniń birinshi orynbasary Roman Sklár kásipkerlerge keltirilgen zalaldy óteý mehanızmin qabyldaıdy. Bul mehanızm joǵaryda atalǵan prosedýralardy, sonyń ishinde Óńirlik komısıalar týraly erejeni reglamentteıdi. Qujattyń jobasyn «Atameken» UKP mamandary daıyndap, memlekettik organdarǵa jiberip qoıdy.
Barlyq normatıvtik qujat bekitilgen soń InfoKazakhstan saıtynda qoljetimdi bolady.
Komısıa quramyna ákimdik, máslıhat, Óńirlik kásipkerler palatasynyń jáne qoǵamdyq birlestikterdiń ókilderi kirýi usynylǵan.
Zalaldy óteý týraly sheshimdi kásipkerdiń ótinishi jáne joǵaryda sıpattalǵan tıisti qujattar (InfoKazakhstan arqyly berilgen) negizinde qarjylandyrý kózine baılanysty óńirlik komısıa nemese Qordyń komısıasy shyǵarady.
Zalaldy óteýge ótinim qabyldaý qashan jáne qaıda bastalady?
Ótinimdi qabyldaý mehanızmi bekitilgen soń bastalady.
Kásipkerlerden ótinimderdi qabyldaýdyń biryńǵaı orny InfoKazakhstan platformasy bolyp belgilendi. Jumysty iske qosý úshin tehnıkalyq múmkindik qarastyrylǵan.
Budan bólek, 11 qańtarda janashyr bıznes ókilderiniń bastamasymen «Kúshimiz Birlikte» – «Sıla v edınstve» qory quryldy. Bul qor zardap shekken kásipkerlerge qarjylaı kómek kórsetýge daıyndyǵyn bildirdi. Qazir qor naqty erejelerdi ázirlep jatyr. Ondaǵy tásildemeler Úkimet komısıasy bekitken mehanızmge sáıkes retteledi.
Sonymen qatar, kásipkerlerge keltirilgen zalaldy óteý mehanızmin ázirleý jáne bekitý boıynsha júrgizilip jatqan jumystardan basqa, «Atameken» Ulttyq kásipkerler palatasy tótenshe jaǵdaı kezinde zardap shekken bıznesti odan ári qoldaý boıynsha Úkimetke usynystar paketin daıyndap jatyr.