«Almaty qalasy kúni» merekesine oraı Jambyl atyndaǵy Qazaq Memlekettik akademıalyq fılarmonıasynda jetekshi solıserdiń qatysýymen maýsymashar konserti ótti.
Keshtiń shymyldyǵy fılarmonıanyń 89 jyldyq tarıhynda qyzmet etken qazaq óneriniń maıtalmandary – Dına Nurpeıisova, Ámire Qashaýbaev, Qalı Jantileýov, Músilim jáne Rıshat Abdýllınder, Kúlásh Baıseıitova, Shara Jıenqulova, Jamal Omarova, Júsipbek Elebekov, Bıbigúl Tólegenova, Roza Baǵlanova, Maıgúl Qaztýǵanova syndy tulǵalardyń esimderimen atalyp, ulttyq óner tarıhyna sholýmen bastaldy.
Konserttiń alǵashqy bólimi álemge áıgili ıtalán kompozıtory Lýıdjı Bokkerınıdiń vıolonchel men fortepıanoǵa arnalǵan “Rondo” shyǵarmasymen ashyldy. Bul týyndy óz talǵampaz stılimen keshti mándi bastap berdi. Keshte Halyqaralyq baıqaýlardyń laýreattary, fılarmonıanyń jetekshi solıseri Musa Kerimbaev, Ádil Nesipbaev, Gúljan Ózenbaeva, Dınara Bazarbaeva-Sahaman, Erkebulan Saparbaev, Aıda Aıýpova syndy ónerpazdar óz ónerlerin pash etti. Kópten beri kútken maýsymashar tyńdarmannyń ystyq yqylasymen bastalyp, alǵashqy týyndylardan-aq gúl shoqtary men qoshemetke bólendi.
Fılarmonıanyń mýzykalyq saıasaty – dástúrli qazaq mýzykasy men álem klasıkteriniń shyǵarmalaryn nasıhattaý, osyǵan kýá bolarlyqtaı, sahnada halyq aspaptarynan bastap, sımfonıalyq shyǵarmalarǵa deıingi ártúrli janrlar oryn aldy. Keshtiń jalǵasynda qazaqtyń dástúrli án-kúıleri shyrqalyp, uly dala tarıhy men mádenıetine qurmet kórsetildi.
Baǵdarlama aıasynda Mádenıet qaıratkeri Erjan Álimbetov, Mádenıet salasynyń úzdigi Maqpal Qazybekqyzy, sondaı-aq Halyqaralyq baıqaýlardyń laýreattary Birjan Báziljan men Janqoja Aıapov dástúrli ónerdi pash etip, tyńdarmandy tánti etti. Konsert qazaq án-kúıimen aıaqtalyp, kórermenniń erekshe ystyq yqylasyna bólendi».
