«Aýyl» partıasynan Qazaqstan Respýblıkasynyń Prezıdenttigine kandıdat Jıgýlı Daırabaev «DANMARD» JSHS eńbek ujymymen kezdesti. Kezdesý barysynda kandıdat olarmen eńbek adamynyń rólin arttyrý jáne eldegi jeńil ónerkásiptiń jaı-kúıi máselelerin talqylady.
«DANMARD» JSHS ásker men órt sóndirýshilerge kıim tigedi. Kásiporyn búginde óz óndirisin damytýda jáne jetildirýde. Kezdesýde kandıdat óziniń saılaýaldy naýqany aıasynda eńbek adamynyń róli men mańyzdylyǵyn arttyrýǵa qol jetkizýdi josparlap otyrǵanyn aıtty.
Jıgýlı Daırabaev sonymen qatar, memlekettik tapsyrystardyń ádil bólinýi tıis ekenine toqtalyp, ulttyq jáne kvazımemlekettik kompanıalar tek ımporttyq taýarlardy satyp alatynyn atap ótti.
«Elimizde jeńil ónerkásip, onymen aınalysatyn jeke bólim joq. Bul úlken qatelik. Ekonomıkanyń osy salasyn jandandyrý jáne damytý úshin ulttyq kompanıalar otandyq óndiristi qoldaýy kerek. Mysaly, jeńil ónerkásip ónimderin úlken kólemde satyp ala alatyn QTJ-nyń búıregi ımportqa buryp turady. Naryqtyq ekonomıkanyń óz zańdylyǵy bar, túsinemiz, biraq bizde otandyq ónerkásip basymdyqqa ıe bolýy kerek. Sondyqtan men barlyq qazaqstandyqty óz ónimderimizdi qoldaýǵa shaqyramyn», – dedi kandıdat.
Sonymen qatar Jıgýlı Daırabaev óńirlerde jeńil ónerkásipti damytýdy usyndy.
«Óńirlerde, ásirese aýyldyq eldi mekenderde jumys kúshi mol. Aýyldarda jeńil ónerkásip kásiporyndaryn damyta otyryp, biz kóptegen máseleni sheship, aýyl turǵyndaryn jumyspen qamtamasyz eter edik», – dedi Jıgýlı Daırabaev.
Kezdesý sońynda kandıdat qyzmetkerlerdiń óziniń saılaýaldy baǵdarlamasy týraly qoıǵan suraqtaryna jaýap berdi.