Ulttyq kınony qoldaý memlekettik ortalyǵy bıylǵy qarjylandyrýǵa úmitker kınojobalardy irikteý úshin konkýrsty qaıta jarıalaıdy
Ulttyq kınony qoldaý ortalyǵy baspasóz qyzmetiniń málimetinshe, mundaı sheshim aýdıtorlyq tekserý qorytyndysy boıynsha bekitilgen. Buǵan deıin jarıalanǵan konkýrstyq ótinimderdi qabyldaý nátıjeleri jaramsyz dep tanyldy, dep habarlaıdy Almaty-alkshamy.kz
Jańa konkýrsqa úmitkerlerdiń qujattary 9-29 tamyz aralyǵynda qabyldanady. Kınojobalardy qorǵaý, ıaǵnı Saraptamalyq keńes otyrysy qyrkúıek aıynyń sońynda ótedi.
Konkýrstyq irikteýdiń qorytyndysy bıyl qazan aıynda jarıalanady.
«Biz memlekettik qarjy esebinen túsirilip, keıin «ulttyq fılm» dep tanylatyn jobalar týraly aıtyp otyrmyz. Sondyqtan tekserý júrgizgen aýdıtorlardyń usynystary men sheshimin eskerý jáne oryndaý kerek. Eń aldymen, barlyq rásimderdiń ashyqtyǵyn qamtamasyz etip, sybaılas jemqorlyq táýekelderin barynsha boldyrmaý qajet. Kıno qaýymdastyǵy naryqty damytý men sapany arttyrý úshin birigip jumys isteýi kerek. Eshqandaı ıntrıga qajet emes. Biz óz tarapymyzdan úmitkerlerge barynsha kómektesýge ári kınojobalarǵa aqparattyq qoldaý kórsetýge daıynbyz. Ortalyq ta, kınogerler de ár teńge úshin esep beretinin este ustaǵany jón», – dedi Ulttyq kınony qoldaý memlekettik ortalyǵy basqarma tóraǵasy Qurmanbek Jumaǵalı.