Kóptegen jolaýshylar úshin jol júrý qunynyń ósýi 20 teńgeni quraıdy. Bul týraly máslıhattyń VII sesıasynda Almaty ákiminiń orynbasary Asqar Ámrın málimdedi. Ol megapolıste jol júrý quny tasymaldaýshylardyń shyǵyndarynyń ósýine qaramastan 11 jyldan astam ýaqyt boıy ózgerissiz bolǵanyn atap ótti, dep habarlaıdy almaty-akshamy.kz
«Aǵymdaǵy tarıf tasymaldaýshylardyń shyǵyndaryn ótemeıdi, óıtkeni jol júrýdiń naqty quny bekitilgennen 3 ese qymbat. Osyǵan baılanysty ákimdik aı saıyn tasymaldaýshylardyń shyǵystaryn sýbsıdıalar túrinde jabýda. 2020-2022 jyldar kezeńinde tólengen sýbsıdıalar somasy 115,8 mlrd. teńgeni qurady», - dep naqtylady Asqar Ámrın.
Statısıkaǵa sáıkes, ótken onjyldyqta kólikte jol júrý baǵasy respýblıka boıynsha basqa qalalarda birneshe ret ózgerdi. Qazir bir aılyq abonementtiń quny Óskemende-9000 teńgeden joǵary, Qaraǵandyda – 6000 teńgeden tómen, Almatyda – 7500 teńge.
Erejege sáıkes, qoǵamdyq kóliktegi jol júrý tarıfi tasymaldaýshylardyń shyǵyndary artyq bolǵannan keıin únemi qaıta qaralýy kerek. Ótken onjyldyqta baǵanyń jalpy ósýi aıasynda sapar quny jasandy túrde bir deńgeıde ustaldy, degenmen 2012 jyldan bastap otyn men gaz 300%-ǵa qymbattady.
«Inflásıany, JJM baǵasynyń ósýin jáne qosalqy bólshekterdiń shyǵynyn eskere otyryp, tólenetin sýbsıdıalar somasy jyl saıyn 10-nan 30%-ǵa deıin ulǵaıady», - dedi Almaty ákiminiń orynbasary depýtattar aldynda sóılegen sózinde.
Naryq kez kelgen ózgeristerge sezimtal: eger kólik ınfraqurylymy damyp jatsa, baǵalar birdeı deńgeıde qalmaıdy.
«Avtopark tozǵan, avtobýstaǵy kondısıonerler týraly áńgime bolǵan joq, avtobýstardyń ózi de jaqsy jaǵdaıda emes. Sodan beri 11 jyl ótti, barlyq taýarlar men qyzmetterdiń baǵasy kóterildi, tek jol júrý quny ózgerissiz qaldy, bul kez-kelgen logıkaǵa qaıshy keledi», - dep jazady qoǵam qaıratkeri Andreı Andreev. «Jol júrý baǵasy naryqqa sáıkes bolýy kerek degen» tujyrymǵa «Ortaq jol» jol qozǵalysy qaýipsizdigi qaýymdastyǵynyń» basshysy Arsen Shakýov ta senimdi.
Sonymen qatar, jolaýshylardyń kópshiligi úshin jol júrý qunynyń ósýi 20 teńgeni quraıdy. Qolma-qol aqshasyz tólem ádisin qoldanatyndar úshin bul soma azdap ósedi. «Almaty kólik holdıńi» JSHS derekteri boıynsha barlyq jolaýshylar arasynan shamamen 97%-ǵa jol júrý aqysyn «Ońaı» kartalarymen, onyń ishinde «Ońaı» qosymshasynda QR-kod nemese SMS-habarlama arqyly tóleıdi. Jalpy, qoǵamdyq kólikti kúnine 1,4 mıllıonǵa deıin adam paıdalanady.
Megapolıstiń kólik ınfraqurylymynyń júktemesi óte zor, bul rette joldardyń jaı-kúıine, qala bıligi avtoparkti jańartýǵa erekshe kóńil bóledi.
«Qolma-qol aqshasyz tólemmen 100 teńge jáne qolma-qol tólemmen 200 teńge mólsherinde jańa tarıfterdi qoldaný bıylǵy jyly sýbsıdıalar somasyn shamamen 10 mlrd teńgege tómendetýge múmkindik beredi. Olardy basqa da áleýmettik mańyzy bar jobalarǵa qaıta bólýge bolady», - dep sózin aıaqtady Almaty qalasy ákiminiń orynbasary Asqar Ámrın máslıhattyń VII sesıasynda.
Aıta keter bolsaq, Almatyda 10 jyldan astam ýaqyt ishinde baǵyttarǵa qyzmet kórsetýge baılanysty barlyq baptary boıynsha ketken shyǵyndar 3 esege artqan. Mysaly, 2012 jyly dızel otynynyń baǵasy 90 teńgeni qurasa qazir onyń baǵasy 295 teńge, al gazdyń quny sol kezde 33 teńge bolsa, búginde 108 teńge. Jalpy ósim 3,3 eseni qurady. Osyǵan uqsas jaǵdaılar avtobýstardyń, shınalardyń, jaǵarmaı materıaldarynyń, avtobýstarǵa tehnıkalyq qyzmet kórsetý men jóndeýdiń jáne t. b. qunynyń ósýine oraı qalyptasty.
Aqparat úshin, Astanada tarıftiń quny 90 teńge jáne 180 teńge, SHQO-da - 90 teńge jáne 130 teńge, Jambyl oblysynda - 85 teńge jáne 130 teńge, Qostanaı oblysynda - 100 teńge jáne 170 teńge mólsherinde belgilengen.