«Almaty kólik holdıńi» JSHS aqparaty boıynsha, qalalyq qoǵamdyq kólikti paıdalanatyn jolaýshylardyń 97%-y jol aqysyn qolma-qol aqshasyz tásilmen – «Ońaı» kartalarymen, onyń ishinde «Ońaı» qosymshasyndaǵy vırtýaldy kartalarmen, sondaı-aq QR nemese SMS arqyly tóleıdi, dep habarlaıdy almaty-akshamy.kz
Osylaısha, Almaty jolaýshylarynyń kópshiligi úshin qolma-qol aqshasyz tólem kezinde jol júrý aqysyn 100 teńgege deıin arttyrý 20 teńgeni quraıdy. Bul rette barlyq jeńildikti sanattar saqtalady jáne olar úshin jol júrý quny tek 10 teńgege deıin ulǵaıady.
Almatyda qoǵamdyq kólik úshin jol júrýdiń qoldanystaǵy quny 2012 jyly belgilendi. Sodan beri tasymaldaý shyǵyndarynyń birneshe ese artýyna, sondaı-aq dızel otyny men gaz baǵasynyń ósýine qaramastan, tarıf 80 teńge deńgeıinde saqtaldy.
Mysaly, 11 jyl buryn dızel otynynyń quny 90 teńgeni, al búgingi kúni 295 teńgeni, al gazdyń quny buryn 33 teńgeni, al búgingi kúni 108 teńgeni qurady. Avtobýstardyń qunyn qosa alǵanda, qalǵan shyǵyndar boıynsha da osyndaı jaǵdaı. Tasymaldaýshylar jańa avtobýstar satyp alýda, jańa marshrýttar ashylýda, qoldanystaǵylar jańǵyrtylýda. Osyǵan baılanysty aǵymdaǵy jyly jol júrý qunyn arttyrý qajettiligi týyndaıdy.
Jyl saıyn Almaty ákimdigi áleýmettik mańyzy bar qalalyq avtobýs marshrýttaryn sýbsıdıalaýǵa qarajat bóledi jáne osy ýaqyt ishinde qoǵamdyq kólikte jol júrý quny memlekettik sýbsıdıalar esebinen qoldaý tapty. Olarsyz tarıftiń quny aǵymdaǵy jyly tarıfterdi esepteý ádistemesine sáıkes 425 teńgeni quraıtyn edi.
Bul shyǵyndar kórsetiletin qyzmetterdiń sapasyna tikeleı áser etedi, óıtkeni túsetin qarajat tasymaldaýshylardyń barlyq shyǵyndaryn ótemeıdi. Rentabeldiligi tómen bolǵandyqtan, kompanıalar jańa jyljymaly sostavty satyp alýǵa jáne avtoparkterin jańartýǵa múddeli emes. Bul avtobýstardyń jetispeýshiligine jáne qolda bardyń tozýyna tikeleı áser etedi.
Bul rette búgingi tańda árbir avtobýstyń qozǵalysyn baqylaýǵa, qoǵamdyq kólik jumysynyń ártúrli krıterııleri boıynsha esep júrgizýge múmkindik beretin avtomattandyrylǵan júıeler engizildi. Nátıjesinde Almaty aglomerasıasy aıasynda kólikti sıfrlandyrý jáne jolaýshylardyń kóshi-qonyn anyqtaý múmkin boldy.
Jyl saıyn tasymaldaýshylar jańa jyljymaly birlikterdi satyp alady, olar sońǵy jyldary birneshe ret qymbattady. Aǵymdaǵy jyly komýnaldyq avtopark 600 avtobýs pen 100 troleıbýsqa shart jasasty.