QR Ǵylym jáne joǵary bilim mınıstriniń buıryǵymen Ulttyq ǵylym akademıasynyń vıse-prezıdentteri taǵaıyndaldy, dep habarlaıdy Almaty-akshamy.kz.
QR Ǵylym jáne joǵary bilim mınıstriniń 2023 jylǵy 10 mamyrdaǵy buıryǵymen Qazaqstan Respýblıkasy Prezıdentiniń janyndaǵy «Qazaqstan Respýblıkasynyń Ulttyq ǵylym akademıasy» KEAQ vıse-prezıdentteri bolyp Asqar Jumadildaev, Aqylbek Kúrishbaev, Lázzat Eralıeva, Takır Balyqbaev taǵaıyndaldy.
Asqar Serqululy Jumadildaev – belgili qazaqstandyq matematık-ǵalym jáne qoǵam qaıratkeri, fızıka-matematıka ǵylymdarynyń doktory, profesor, Qazaqstan Respýblıkasy UǴA-nyń akademıgi. Ol matematıka jáne ǵylym salasyndaǵy jetistikteri úshin kóptegen marapat pen grant alǵan.
Aqylbek Qajyǵululy Kúrishbaev – aýyl sharýashylyǵy ǵylymdarynyń doktory, profesor. Osy saladaǵy jetistikteri úshin birneshe ret marapattalǵan. Ekonomıkany, ǵylymdy jáne joǵary bilimdi damytýǵa, sondaı-aq belsendi qoǵamdyq qyzmetke sińirgen eńbegi úshin «Qurmet» jáne «Parasat» ordenderimen marapattalǵan.
Lázzat Tasbolatqyzy Eralıeva – profesor, medısına ǵylymdarynyń doktory, 2013 jyldan bastap «Medısına ǵylymdary» seksıasy boıynsha Reseı jaratylystaný akademıasynyń (RJA) korespondent-múshesi. Ol –150-den astam maqalanyń, 2 ulttyq nusqaýlyqtyń, monografıalar men ádistemelik nusqaýlyqtardyń, sonymen qatar 4 ónertabys patentiniń avtory.
Takır Ospanuly Balyqbaev – fızıka-matematıka ǵylymdarynyń kandıdaty jáne pedagogıka ǵylymdarynyń doktory, sondaı-aq, óz salasynda aıtarlyqtaı tájirıbesi bar profesor. Reseıdegi kásiptik bilim berýdi qoldaý qorynyń A.G.Nebolsın atyndaǵy syılyǵynyń laýreaty. 2018 jyly «Parasat» ordenimen marapattalǵan.