Qazaqstan Respýblıkasy Ulttyq Ǵylym akademıasynyń mártebesin arttyrý maqsatynda Memleket basshysy 27 naýryzda ony Qazaqstan Respýblıkasy Prezıdentiniń janyndaǵy «Qazaqstan Respýblıkasynyń Ulttyq Ǵylym akademıasy» komersıalyq emes aksıonerlik qoǵamy dep qaıta ataý týraly Jarlyqqa qol qoıdy.
Prezıdent janyndaǵy Ǵylym akademıasy qyzmetiniń negizgi baǵyttarynyń qatarynda áleýmettik-ekonomıkalyq damýdyń basymdyqtaryna sáıkes ǵylymı, ǵylymı-tehnıkalyq jáne ınovasıalyq qyzmettiń basym baǵyttaryn, sondaı-aq strategıalyq damýdyń, irgeli jáne qoldanbaly ǵylymı zertteýlerdiń basym baǵyttaryn aıqyndaý boıynsha usynymdar ázirleý bolady, dep habarlaıdy Almaty-akshamy.kz.
Ulttyq Ǵylym akademıasynyń memlekettik mártebesi qaıtaryldy. Akademıkterge stıpendıalar belgilendi, akademıany respýblıkalyq búdjetten qarjylandyrý máseleleri sheshildi, «Ǵylym Ordasy» ǵımaratyn kúrdeli jóndeý bastaldy.
Endi Qazaqstan Respýblıkasynyń Ulttyq Ǵylym akademıasy elimizdiń joǵary ǵylymı uıymy bolyp tabylady. Memleket basshysy akademıaǵa Joǵary memlekettik mártebe berdi - Qazaqstan Respýblıkasy Prezıdentiniń janyndaǵy QR UǴA! Sonymen qatar, álemniń barlyq jetekshi elderindegi sıaqty bizdiń Ǵylym Akademıasynyń barlyq músheleriniń mártebesi de artyp keledi.
Qazaqstan Respýblıkasynyń Prezıdenti Q.Toqaev Ǵylym Akademıasyna joǵary bedel berý týraly Jarlyqqa qol qoıdy. Endi QR UǴA men úlken ǵylymnyń barlyq máseleleri QR Prezıdenti Ákimshiliginde sheshiletin bolady.
Ulttyq Ǵylym akademıasynyń Prezıdentin Qazaqstan Respýblıkasynyń Prezıdenti qyzmetke taǵaıyndaıdy jáne qyzmetten bosatady.