Memleket basshysy Qasym-Jomart Toqaev Qazaqstan halqy Assambleıasynyń «Birlik. Jasampazdyq. Órleý» atty HHHİİİ sesıasynyń otyrysynda eldegi sý tasqyny jaǵdaıyn qozǵap, memleket tarapynan pármendi sharalar qabylanýy tıis ekenin aıtty, dep habarlaıdy Almaty-akshamy.kz.
«Apattarǵa qarsy kúrestiń tıimdi júıesin qurýdy kózdeıtin kúrdeli sharýa sheshimin tabýy kerek. Sondyqtan tabıǵat apattarymen kúresetin pármendi sharalar qabyldaý úshin memleket pen ǵylymnyń yqpaldastyǵyn is júzinde qaıtadan túzý qajet. Meniń tapsyrmammen Tarazdaǵy Qazaq gıdromelıorasıa-qurylys ınstıtýty qaıta qurylady. Sondaı-aq Almatydaǵy Seısmologıa ınstıtýtynyń áleýeti kúsheıedi. Klımat ózgeristerin zerttep, tejeýge aıryqsha nazar aýdarylady. Sý sharýashylyǵy salasyn basqarý júıesi, onyń ishinde «QazSýSHar», «Nura toptyq sý qubyry» sıaqty kompanıalar da túgel qaıta qurylady», - dedi Prezıdent.
Aıta ketsek, Qazaqstandaǵy bógetter men bógenderdiń barlyǵy derlik ótken ǵasyrdyń 50-70 jyldary salynǵan. Zaman talabyna saı sý qoımalary tapshy bolǵandyqtan, bıylǵy tasqynnyń zardaby tipti aýyr boldy. Sondyqtan Qazaqstannyń 11 aımaǵynda jańadan 20 bógen salynady, taǵy 15-ine kúrdeli jóndeý júrgiziledi. Sonda 134 eldi mekendi sý basý qateri edáýir azaıady.
Memleket basshysy sý resýrstaryn basqarý júıesin damytý tujyrymdamasyna tasqynnyń aldyn alý jáne onyń saldaryn azaıtý sharalary qosylatynyn málimdedi. Bul sharalar halyqaralyq tájirıbeni eskere otyryp ázirlenedi.
«Tótenshe jaǵdaılar mınıstrliginiń tehnıkalyq bazasyn jańartamyz. Onyń arnaıy tehnıkasynyń, tikushaqtary men ushaqtarynyń sanyn kóbeıtemiz. Ulttyq gıdrogeologıa qyzmeti qaıta qurylady. Bul qyzmet jer asty sý resýrstaryn barlaý jáne qorǵaý jumysymen aınalysady. Qorshaǵan ortanyń jaı-kúıine bárimiz jaýaptymyz, muny esten shyǵarmaý kerek. Qoǵamda ekologıa mádenıetin qalyptastyryp, tabıǵatty aıalaý qaǵıdasyn dáriptegen jón. Meniń bastamammen elimizde «Taza Qazaqstan» jalpyulttyq naýqany ótip jatyr. Mundaı sharalar sý tasqyny bolǵan aımaqtarda da uıymdastyrylady. Eskertemin, bul – eshqandaı da bir rettik is-shara emes. Barlyq óńirde aýmaqtardy kógaldandyrýǵa jáne tazalaýǵa kóp kóńil bólý kerek. Árkim ortaq iske úles qosatyn bolsa, elimiz kórkeıe túsedi», - dep túsindirdi Qasym-Jomart Kemeluly.
El Prezıdenti qoǵam múlkine zalal keltiretin adamdar zańmen jaýapqa tartylatynyn eske saldy.
«Ákimder Úkimetpen birlesip jergilikti joldardy jóndeýge kirisýi qajet. Bul jumystar ákimderdiń qyzmetin baǵalaıtyn negizgi ındıkatorlar tizimine engiziledi», - dep qosty Memleket basshysy.