Qazaqstan halqy Assambleıasynyń HHHİİİ sesıasynda sóılegen sózinde Qasym-Jomart Toqaev Assambleıanyń ınstıtýsıonaldyq áleýetin nyǵaıtý qajet ekenin, onyń memlekettik organdarmen, Parlamentpen jáne máslıhattarmen qarym-qatynasyn jaqsarta túsý kerek ekenin aıtty, dep habarlaıdy Almaty-akshamy.kz.
«Assambleıa barlyq deńgeıdegi mekemelermen túrli baǵytta seriktestik ornatyp, basqalarǵa úlgi bolýǵa tıis. Jergilikti atqarýshy organdarmen jáne máslıhattarmen jumys júrgizý úshin tıimdi tásilder tabýǵa basa mán bergen jón. Ákimder kúndelikti týyndaıtyn kóptegen máselemen aınalysady. Olardyń jumysy óte kóp, bul – túsinikti jaǵdaı. Biraq el birligin nyǵaıtý – aıryqsha mańyzdy mindettiń biri. Ony eshqashan nazardan tys qaldyrmaý kerek», dedi Prezıdent.
Memleket basshysynyń aıtýynsha, sońǵy jyldary Assambleıanyń qyzmeti aıtarlyqtaı ózgerip, qoǵamdaǵy asa mańyzdy ınstıtýtqa jáne etnomádenı birlestikterdiń bas shtabyna aınaldy.
«Meniń tapsyrmammen aımaq basshylary keminde eki aıda bir ret Assambleıa ókilderimen birge etnosaralyq ahýalǵa qatysty jınalys ótkizedi. Assambleıanyń negizgi is-sharalaryna oblys jáne respýblıkalyq mańyzy bar qala ákimderi tikeleı ózderi qatysýǵa tıis. Men muny orynbasarǵa ysyra salýǵa bolmaıtynyn naqty eskerttim. Ózgelerdiń, ásirese, Parlamenttiń jáne barlyq deńgeıdegi máslıhat depýtattarynyń dál osylaı jasaǵany abzal», dedi Qasym-Jomart Toqaev.
Sondaı aq Prezıdent Assambleıa memlekettik sheshim qabyldaý úderisine jáne reformalardy ilgeriletý isine belsene qatysýy kerek ekenin aıtty.
«Sondyqtan onyń ǵylymı-saraptamalyq áleýetin damytý qajet. Etno-áleýmettik shıelenis oshaqtaryn anyqtaýǵa jáne ondaı oqıǵalardyń aldyn alýǵa basa mán berilýge tıis. Almaty, Jambyl jáne Túrkistan oblystarynyń mamandary etnomedıasıaǵa qatysty jumysty qolǵa aldy. Onyń aýqymyn keńeıtip, bul tájirıbeni Assambleıanyń barlyq uıymdaryna taratý qajet», dedi Memleket basshysy.
Prezıdenttiń aıtýynsha, Assambleıany áleýmettik tutastyq pen otanshyldyqty dáripteıtin ınstıtýt retinde nyǵaıtý kerek. Eń aldymen, Aqsaqaldar keńesi jáne Analar keńesi sıaqty tıimdi qurylymdardy damytqan lázim. Mınıstrlikter jáne ákimdikter olardyń qyzmetine qoldaý kórsetýi qajet. Arnaıy granttar bólip, memlekettik áleýmettik tapsyrystar berýi kerek.
«Jastar Assambleıa qyzmetine tyń serpin ákeledi. Sondyqtan Assambleıa qurylymdary men etnomádenı birlestik basshylarynyń bir orynbasaryn jastardan taǵaıyndaýdy usynamyn. Ortalyq jáne jergilikti organdar Assambleıanyń jastarǵa, ásirese, volonterlerge qatysty jobalaryna jan-jaqty qoldaý kórsetýi kerek. Mundaı jobalardyń tizimin jasaǵan jón», dedi Memleket basshysy.