Premer-mınıstr Oljas Bektenov pen Eńbek jáne halyqty áleýmettik qorǵaý mınıstri Svetlana Jaqypovanyń atyna saýal joldaǵan depýtattar balalardy qorǵaý kúnin memlekettik mereke retinde bekitýdi usynǵan, dep habarlaıdy aqshamnews.kz
Qazaqstanda 1 maýsym - «Balalardy qorǵaý kúni» memlekettik mereke retinde belgilenýi múmkin. Bul týraly bir top depýtattyń depýtattyq saýalyna jaýap bergen Eńbek jáne halyqty áleýmettik qorǵaý mınıstri Svetlana Jaqypovanyń jaýabynda aıtylǵan.
«Bul mereke jyl saıyn 1 maýsymda ótedi, ol endigi memlekettik mártebege laıyq dep sanaımyz», - dep jazǵan edi depýtattar óz saýalynda.
Ózge de mereke kúnderin aýystyrýǵa qatysty qazirgi erejelerdi baıandaǵan mınıstrlik depýtattardyń pozısıasyn qoldap, mynandaı jaýap qaıtarǵan.
«Dástúr boıynsha, bul kúni ata-analar balalardy atraksıondar saıabaǵyna, oıyn ortalyqtaryna serýendeýge aparady jáne jalpy merekelik kóńil-kúıdi uıymdastyrady. Atalǵan mereke ata-analar men balalarǵa birlesip ýaqyt ótkizýge, mádenı, tárbıelik jáne qoǵamdyq is-sharalarǵa qatysýǵa múmkindik beredi. Bul balanyń jaqsy psıhoemosıonaldy jaǵdaıda otbasynyń janynda tolyq qaýipsizdikti sezinýine áserin tıgizedi. Joǵaryda aıtylǵandardyń negizinde, sonymen qatar elimizde otbasy ınstıtýty men otbasylyq qundylyqtardy nyǵaıtý maqsatynda «Balalardy qorǵaý kúnin» 1 maýsym kúni memlekettik mereke retinde belgileýdi múmkin dep sanaımyz», - dep jazylǵan Jaqypovanyń jaýabynda.