Almatyda 1 mamyr – Qazaqstan halqynyń birligi kúnine oraı mádenı-gýmanıtarlyq, ekologıalyq is-sharalar legi bastalyp ketti.
Búgin Naýryzbaı aýdanyndaǵy «Ulttar dostyǵy» saıabaǵynda ár ult ókilderi birlikte aǵash otyrǵyzyp, tatýlyq kúnine tartý etti.
Respýblıkalyq «Taza Qazaqstan» aksıasyna ún qosqan bul is-shara Almaty qalasy Qazaqstan halqy Assambleıasynyń etnomádenı birlestikteriniń qatysýymen ótti.
Mundaı sharalar keıingi urpaqqa tatýlyq pen qorshaǵan ortaǵa bolǵan jaýapkershilik sezimin sińiretin tamasha úlgi dep sanaıdy Qazaqstan kúrdteri «BARBANG» respýblıkalyq qaýymdastyǵy tóraǵasynyń orynbasary Vakıl Nabıev.
– Kórip turǵandaryńyzdaı, kóp adam munda balalaryn da erte keldi. Bul óte jaqsy daǵdy, balalardy eńbekke baýlıdy ári qalaǵa, qorshaǵan ortaǵa degen qamqorlyqty naqty is-áreketterimen kórsetedi. Qarańyzshy, qandaı keremet! Aınala tap-taza, jasyl jelek jaıqalyp, kóz qýantady. Barlyq qazaqstandyqtardan qoldaý tapqan osyndaı ıgi dástúr jalǵasyn taba bersin, – deıdi Vakıl Nabıev.
«Ulttar dostyǵy» saıabaǵyndaǵy Saq qorymdary qala ishindegi baıyrǵy babalardan qalǵan qundy tarıhı eskerkishter. Ár ult ókilderiniń saıabaqqa aǵash otyrǵyzyp, abattandyrý jumystaryn jasaýy týǵan jer tarıhyna degen ortaq qurmettiń sımvoly ispetti.
Almaty qalasyndaǵy ózge de etnomádenı birlestik ókilderi de ekologıalyq is-shara atsalysty. «Cemırechıa kazaktar odaǵy» respýblıkalyq qoǵamdyq birlestigi Almaty qalalyq fılıalynyń jetekshisi Semón Shıhotov «Qazaqstandaǵy ár kúnimiz meıirimdi isterge toly bolsyn» degen merekelik tilegin joldap bylaı dedi:
«Bul tek ekologıaǵa qosqan úles qana emes, sonymen qatar elimiz úshin ortaq jaýapkershiligimizdiń sımvoly. Aǵash otyrǵyzý – túrli etnos ókilderin ortaq qundylyqqa biriktiretin is. Jerge degen qamqorlyq, tabıǵatqa qurmet jáne jarqyn bolashaqqa umtylys.
Qazaqstandaǵy ár kún meıirimdi isterge, bir-birimizge degen qurmetke jáne ortaq jarqyn bolashaǵymyzǵa degen senimge toly bolsyn! Baqyt, beıbitshilik jáne órkendeý tileımin!, – dedi Semón Vladımırovıch.