Almatyda UOS ardagerleriniń zıratyn tazartý boıynsha jastar aksıasy ótti.
Uly Otan soǵysyndaǵy jeńistiń 80 jyldyǵyna arnalǵan is-sharalar aıasynda Keńsaı-1 jáne Keńsaı-2 zırattarynda maıdangerler jerlengen oryndardy tazartý jáne abattandyrý boıynsha jastar aksıasy ótti. Igi sharaǵa qala jastary, joǵary oqý oryndarynyń stýdentteri, volonterlik uıymdardyń músheleri jáne qoǵam belsendileri qatysty. Qatysýshylar zırat mańyn tazalap, abattandyrý jumystaryn júrgizdi, sondaı-aq, ardagerlerdiń zıratyna gúl shoqtaryn qoıyp, rýhyna taǵzym etti.
“Aksıanyń basty maqsaty – Otandy qorǵaǵan ardagerlerdiń erligine taǵzym etý, olardyń esimderin jadymyzda saqtaý jáne jas urpaqtyń boıynda tarıhı sanany qalyptastyrý boldy”, - deıdi uıymdastyrýshylar.
Al Qazaq ulttyq agrarlyq zertteý ýnıversıtetiniń 1-kýrs stýdenti Aıda Asylhanqyzy:
«Biz bul sharaǵa Agrarlyq ýnıversıtetten erikti retinde keldik. Keńsaı zıratynda ardagerlerdiń eskertkishterin tazalaý arqyly tek qoǵamdyq paıdaly is jasap qana qoımaı, ózimizdiń rýhanı jáne ımanı turǵydan da nyǵaıyp jatqanymyzdy sezemiz. Bul — ótkenge qurmet kórsetý ǵana emes, ózimizdi tárbıeleýdiń de bir joly. Munda kóptegen volonter jınaldy, barlyǵy shyn nıetimen jumys istep jatyr. Biz úshin bul úlken sabaq boldy. Ardagerler kezinde biz úshin janyn berdi, al biz búginde sol erliktiń izimen júrip, olardy umytpaýymyz kerek. Halyqta jaqsy sóz bar: "Biz de olardaı bolamyz, olar da bizdeı bolǵan". Osy sóz osy sátke dál keletin sıaqty. Ótkenniń erligin umytpaı, sony baǵalaı bilý – bizdiń basty mindetimiz», - deıdi.
Tólebı OSPAN, Almaty qalasynyń bas ımamy:
Barshany rýhanı tárbıege shaqyrý
Búgin Bas múftı Naýryzbaı qajy Taǵanuly hazirettiń bastamasymen respýblıka kóleminde zırattardy tazalaý sharasy ótip jatyr. Almaty qalasynda da osy bastama aıasynda 8 zıratta meshit jamaǵaty, ujym músheleri jáne ımamdar qatysyp, tazalyq jumystaryn júrgizip jatyrmyz. Maqsat –qala turǵyndaryn zırattardy tazalaýǵa úndeý, soǵan shaqyrý.
Biz barlyq zıratty bir kúnde tolyqtaı tazalap úlgere almaımyz. Sondyqtan bul – qala turǵyndaryna oı salý, árkim óz ata-anasynyń, aǵaıyn-týystarynyń basyna baryp, qoqysty jınap, synǵan jerlerin jóndep, qurmet kórsetýge baǵyttalǵan áreket. Iaǵnı, bul – barsha qoǵamdy rýhanı tárbıege shaqyrý. Búgingi sharaǵa Almaty qalasy boıynsha shamamen myńǵa jýyq adam jumyldyryldy. Mysaly, Keńsaı zıratynyń ózinde júzge jýyq adam qatysty. Qaladaǵy basqa zırattarda da dál osyndaı belsendi jumystar júrgizilip jatyr. Keńsaı zıratynda jerlengen qoǵam qaıratkerleri, ult zıalylary - Dinmuhamed Ahmetuly Qonaev atamyzdyń, Baýyrjan Momyshuly syndy ardagerlerdiń jáne basqa da kórnekti tulǵalardyń zırattaryn tazalap, qurmet kórsetip jatyrmyz. Jumys úlken qurmetpen, jaýapkershilikpen atqarylýda.