Almatyda Qazaqstan men Qytaı arasyndaǵy Strategıalyq dıalogtyń ekinshi otyrysy ótti.
Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileý jáne QKP OK Saıası búrosynyń múshesi, Qytaı Halyq Respýblıkasynyń Syrtqy ister mınıstri Van I Qazaqstan men Qytaı arasyndaǵy Strategıalyq dıalogtyń ekinshi otyrysyna qatysty. Qytaı SİM basshysy 26 sáýirde ótetin «Ortalyq Azıa – Qytaı» formatyndaǵy syrtqy ister mınıstrleriniń kezdesýine qatysý úshin Almatyǵa jumys saparymen keldi.
Strategıalyq dıalog otyrysy barysynda taraptar saıası, saýda-ekonomıkalyq jáne mádenı-gýmanıtarlyq yntymaqtastyqtyń keń aýqymdy máselelerin talqylady. Mınıstrler bıik jáne joǵary deńgeılerde qol jetkizilgen ýaǵdalastyqtardyń iske asyrylý barysyn qarastyrdy, sondaı-aq ekijaqty ózara is-qımyldyń barlyq spektri boıynsha qazaq-qytaı qatynastary damýynyń oń serpinin atap ótti.
Saýda-ekonomıkalyq baılanystardy arttyrý boıynsha birlesken kúsh-jigerge erekshe nazar aýdaryldy. Qazaqstannyń Qytaıǵa shıkizattyq emes eksportyn ulǵaıtýdy qosa alǵanda, ındýstrıalyq-ınvestısıalyq, energetıkalyq, tranzıt-kóliktik jáne ınovasıalyq yntymaqtastyqty birlesip damytýda jańa tásilderdi ázirleý qajettiligi basa aıtyldy.
«Árqashan damı beretin baılanysymyz geosaıası syn-qaterler men konúnktýralyq úrdisterge ushyramaıdy. Qytaı biz úshin meıirimdi kórshi jáne senimdi dos qana emes, sonymen qatar jan-jaqty baılanysy bar jaqyn el», – dep málimdedi M.Nurtileý.
Byltyr ekijaqty taýar aınalymy rekordtyq kórsetkish – 43,8 mlrd AQSH dollaryn qurady. Eki memleket te jaqyn arada ózara saýda kólemin eki esege arttyrýǵa umtylýda. Qazaq-qytaı ınvestısıalyq pýly shamamen 66,4 mlrd AQSH dollary somasyna 224 jobany qamtıdy.
«Biz Qazaqstandy Qytaıdyń kórshiles memlekettermen qarym-qatynasynda basty seriktes retinde qarastyramyz. Qytaı Qazaqstannyń aýmaqtyq tutastyǵyn, egemendigin jáne qaýipsizdigin qorǵaýda, sondaı-aq ulttyq erekshelikterine sáıkes eldiń damýyna baǵyttalǵan kúsh-jigerin nyq qoldaıdy», – dep málimdedi Van I.
Syrtqy saıası vedomstvolarynyń basshylary bıyl josparlanǵan ekijaqty saparlar men is-sharalar kestesin talqylady, sondaı-aq halyqaralyq kún tártibindegi ózekti máseleler boıynsha «saǵattardy teńestirdi».
Kezdesý qorytyndysy boıynsha QR-QHR syrtqy ister mınıstrlikteri arasynda 2026-2028 jyldarǵa arnalǵan yntymaqtastyq týraly memorandýmǵa qol qoıyldy jáne Gýanchjoý qalasynda Qazaqstan Respýblıkasynyń Bas konsýldyǵyn qurý týraly notalarmen almasý rásimi ótti.