«Almaty — bizdiń ortaq úıimiz» naýqany aıasynda Ult Ustazy Ahmet Baıtursynulynyń mýzeı-úıi aýlasyndaǵy gúlzar alańqaıynyń topyraǵyn qopsytyp, kóshetter otyrǵyzyldy.
Shara «Gúl egip, álemdi nurlandyr» aksıasy sheńberinde ótti, - dep habarlaıdy Almaty-akshamy.kz.
Kúni keshe, 8 aqpanda Almaty qalasynyń ákimi Erbolat Dosaev «Almaty – bizdiń ortaq úıimiz» naýqanynyń bastalǵanyn málimdedi. Naýqanynyń basty maqsaty - qalalyq ınfraqurylymǵa uqypty qaraý qundylyǵyn qalyptastyrý, halyq arasynda joǵary azamattyq jaýapkershilik pen ekologıalyq mádenıetti tárbıeleý, jeke ekologıalyq bastamalardy qoldaý men iske asyrýǵa jaǵdaı jasaý. Ol bir aıǵa sozylady.
Búgin osyndaı keremet naýqannyń aıasynda Ult Ustazy Ahmet Baıtursynulynyń mýzeı-úıi aýlasyndaǵy gúlzar alańqaıynyń topyraǵyn qopsytyp, kóshetter otyrǵyzylyp aýla tazartyldy.
İs-sharaǵa elimizdiń Eńbek sińirgen qaıratkeri, aqyn Ulyqbek Esdáýlet, jýrnalıs Qaınar Oljaı, akter Baıǵalı Esenáli, kompozıtor, ánshi Qadyrǵalı Kóbentaı, Almaty qalasy mýzeıler birlestiginiń basshysy Lázzat Saǵyndyqova, tilshi Qarakóz Simádil, ustaz Aıatjan Ahmetjan, tele-jýrnalıst Meırambek Taýbaldıev, kúıshi Tolǵanaı Qasen, ánshi Dilnaz Berdalıeva jáne mýzeı-úıiniń qoǵamdyq belsendileri, stýdentter men oqýshylar qatysty.
Qazaqstannyń Eńbek sińirgen qaıratkeri, aqyn Ulyqbek Esdáýlet qala ákimdiginiń «Almaty – bizdiń ortaq úıimiz» atty naýqanyn ótkizý bastamasyn qoldaıtynyn aıtty. Onyń sózinshe naýryz ejelden aınalany tazartýdy bastaıtyn ýaqyt, mereke ekenin atap ótti. Almaty qalasy mýzeıler birlestiginiń basshysy Lázzat Saǵyndyqova mundaı naýqan tek bir aımen shektelmeı odan ári jalǵasatynyn basa aıtty.