Almaty, Jambyl jáne Qyzylorda oblystarynda ırrıgasıa jáne drenaj júıelerin (IDJ) keshendi rekonstrýksıalaý jumysy aıaqtalýǵa jaqyn.
Atalǵan júıeler egis alqaptaryna sý berip, jerasty sýlarynyń deńgeıin retteıdi jáne topyraqtyń tuzdanýymen kúresedi, dep habarlaıdy aqshamnews.kz Cý resýrstary jáne ırrıgasıa mınıstrligine silteme jasap.
Almaty oblysynyń Eńbekshiqazaq aýdanynda IDJ qaıta jańǵyrtý jumystary júrip jatyr, onyń kómegimen Úlken Almaty kanalynan 5 myń gektar jer sýarylady. Búgingi tańda uzyndyǵy 58,3 shaqyrym bolatyn arnalar 90%-ǵa qaıta jańartyldy. Sý berýdi retteıtin 478 gıdrotehnıkalyq qurylystyń 372-si jóndeldi.
Jambyl oblysynyń Shý aýdanynda Oń jaǵalaý magıstraldyq kanaldan 5 myń gektar jerge sý beretin IDJ rekonstrýksıalanýda. Búgingi tańda uzyndyǵy 69,6 shaqyrym kanal 83%-ǵa, uzyndyǵy 25,3 shaqyrym bolatyn drenaj júıesi 69%-ǵa, uńǵymalar ornatý jumystary 87%-ǵa aıaqtaldy.
Qyzylorda oblysynyń Jalaǵash aýdanynda 4 aýyldyq okrýgte 15,1 myń gektar egis alqabyn Sol jaǵalaý magıstraldyq kanalynan sýmen qamtamasyz etetin IDJ qaıta jańǵyrtý boıynsha «Qyzylorda-1» jobasy iske asyrylyp jatyr. Búgingi tańda uzyndyǵy 1427 shaqyrym kanaldyń 95%-y qaıta jańartyldy, 14 533 gıdrotehnıkalyq qurylys jóndeldi, al 328 shaqyrym drenaj júıesin rekonstrýksıalaý 99%-ǵa aıaqtaldy.
Barlyq úsh jobany osy jyldyń sońyna deıin aıaqtaý josparlanyp otyr.
«Bul jumystardyń barlyǵy Dúnıejúzilik bankpen birge júzege asyrylyp jatqan elimizdiń ońtústigindegi sýarý jáne drenajdyq júıelerdi jetildirý jobasynyń ekinshi kezeńiniń bóligi bolyp tabylady. Sondaı-aq, Túrkistan oblysynda eki IDJ rekonstrýksıalaý aıaqtalýǵa jaqyn. Osyǵan deıin Jambyl oblysynda eki joba aıaqtaldy. Oryndalǵan jumystar kanaldardyń tıimdiligin 25%-ǵa arttyrýǵa, sý shyǵynyn azaıtýǵa, sondaı-aq topyraq jaǵdaıyn jáne aýyl sharýashylyǵyn sýmen qamtamasyz etý kórsetkishin jaqsartýǵa múmkindik berdi», - dedi Sý resýrstary jáne ırrıgasıa vıse-mınıstri Erbolat Ibraıhanov.