Ekologtar senbilik jasaıtynyn habarlady
Úlken Almaty kanalynyń mańy qoqys alańyna aınalyp barady, dep habarlaıdy Almaty-akshamy.kz Almaty.tv-ge silteme jasap.
Bógde bireýler shekteýge qaramastan qala aýmaǵyndaǵy jazyqqa tonnalap qaldyq pen topyraq tógýin toqtatar emes. Medeý aýdany ákimdik ókilderiniń habarlaýynsha, búginde máselege qatysty qaýyrt jumys júrgizilip jatyr. Aýmaqty baqylaýda ustaý úshin polısıa qyzmetkerleri de jumylypty.
Ózen arnasyna qarama-qarsy jatqan bul jazyqqa kiretin 3 burylys bar. Ákimdik ókilderi birinshi kireberiske qoqys tógetinderdi bógeý úshin joldy qazyp, tyıym salǵan. Alaıda erejeni eskermegender bul jerdi qalpyna keltirip, topyraqpen joldy tegistep qoqys tógýin jalǵastyryp jatqan kórinedi.
«Topyraq tógý, qurylys qaldyqtaryn tógý syndy fakt anyqtalyp jatyr. Jyl basynda Ekologıa departamenti anyqtaý úshin komısıa quryldy. Bıyl 30 adamǵa aıyppul salyndy. Áli de jalǵasyp jatyr. Polısıa qyzmetkerlerimen birlesip, kúndelikti baqylap júrmiz», – dedi Medeý aýdany ákimi apparaty abattandyrý bóliminiń bas mamany Marat Tilesov.
Jol jıegimen júrip ótip, ekinshi kireberiske de keldik. Bul jerdi, mine, kórgenderińizdeı ákimdik ókilderi tekserý júrgizip 2 kún buryn ǵana joldy tastarmen bógep tastaǵan. Alaıda munyń qansha ýaqyt turatyny, qashanǵa deıin jabyq bolatyny ázirge belgisiz.
Sebebi «Qoı deıtin qojasy belgisiz» jerdi qansha japsa da júk kólikteri kirýdiń amalyn tabatyn kórinedi. Ákimdik ókiliniń aıtýynsha, olar qoıǵan bógetti alyp tastaǵan kezderi de bolǵan. Aıta ketsek, qoqys tókkenderge salynǵan aıyppul kólemi ázirge 2 mıllıon teńgege jýyqtady. Medeý ákimdigi qazir baqylaý júrip jatqanyn málimdese, ekologtar erteń bul mańǵa senbilik jasaıtynyn habarlady.