Jabaıy ańnan qaýip tónýi múmkin
Jabaıy ańnan qaýip tónýi múmkin. Almatynyń Býtakovka shatqalynan skaýttar lageri evakýasıalandy, dep habarlaıdy Almaty-akshamy.kz Almaty.tv-ge silteme jasap.
Lager qyzmetkeri jaqyn mańaıda mekendeıtin aıý adamdarǵa shabýyldaı ma dep qorqady. Onyń ústine, demalys ornyna kelýshiler qatarynda balalar kóp.
Anna – skaýttar lageriniń nusqaýshysy. Ol munda sportpen aınalysýǵa kelgen balalardy jabaıy ortada ómir súrýge úıretedi. Tabıǵatty aıalap, janýarlarǵa qamqor bolýǵa baýlıdy. Anna ótken aptada jabaıy ańnyń paıda bolǵanyn aıtady.
Demalyp júrip, aıýdyń yryldaǵan daýysynan qoryqqan skaýttar túnimen kóz ilmeı, shatyr janynda ot jaǵyp otyrdyq deıdi. Tipti kómekke qoryqshylardy shaqyrtypty. Alaıda aýmaqty barlap shyqqan Ulttyq park ınspektorlary bolǵan jaǵdaıǵa kúmán keltirgen.
Mańaıdy tekserip shyqqan Ulttyq park ınspektorlary «qoryqqanǵa qos kórinedi» degendi alǵa tartty. Sózderinshe, qazir ańdardyń kóbeıetin ýaqyty. Al beınejazbaǵa jazylǵan dybys elikterden shyqqan deıdi.
«Shaqyrtýdy birden qabyldap, osynda kóterildik. Jaqyn mańaıdyń bárin aralap shyqtyq. Biraq eshqandaı daýys estimedik, eshqandaı janýardy jolyqtyrmadyq. Áriptesterim ańdardyń izin tekserip shyqty. Men lagerde, balalardyń qasynda qaldym», – dedi İle-Alataý ulttyq parkiniń ınspektory Roman Abýev.
Ulttyq park ókilderiniń aıtýynsha, Býtakovka shatqalynda 10 jyldan beri aıýlar kórinbegen. Óıtkeni munda týrıser kóp keledi.
«Meniń bilýimshe, aıý týrıserge tıispeıdi. Sebebi olar adamdardan qorqady. Sondyqtan qaýip joq dep esepteımin. Munda aıý bar degenniń ózinde, olar lagerge jaqyndamaıdy», – dedi İle-Alataý ulttyq parkiniń ınspektory Nurbol Beıisov.
Qoryqshylardyń aıtýynsha, İle-Alataý saıabaǵynda tas sýsary men sileýsin, barys jıi kezdesedi. Al zoologıa ınstıtýtynyń ǵalymdary búginde Almaty taýlarynda 70-ke jýyq Tán-SHan aıýy mekendeıtinin alǵa tartyp otyr. Al lagerdegi demalýshylar ázirge shatqalǵa oralýdy josparlap otyrǵan joq.