Búgingi tańda úleskerlik qurylys tóńireginde qordalanǵan máseleler kezdesip turady. Qala bıligi bul máselege qyryn qaramaı, basty nazarǵa alǵan. Desek te, azamattardy aldaý faktileri kezdesip turady. Almaty ákimi Erbolat Dosaev Medeý aýdany halqymen kezdesýinde úleskerler tarapynan saýal qoıyldy, dep habarlaıdy Almaty-akshamy.kz
- Biz úleskerlik qurylys boıynsha «KB Development» qurylys kompanıasyna aldanyp júrmiz. «Vesnovka» turǵyn úı kesheniniń qurylysy toqtap qaldy. Aqsha da joq, páter de joq. Qurylysshy páterlerdiń bizdiń atymyzda joq ekenin aıtady. Nelikten «Vesnovka» TK páter satýǵa tyıym salmaısyzdar? Agent páter satýdy toqtatpaı keledi? Osy jaǵdaıǵa nazar aýdarsańyz, - dep ótindi turǵyn.
Almaty qalalyq qala qurylysyn baqylaý basqarmasynyń basshysy Baqytjan Naýryzbekovtiń málimeti boıynsha, «Ush Qonyr» turǵyn úı keshenin salǵan KB Development kompanıasy páterlerdi satý úshin 2020 jyldyń shildesinde «Leader Group» kompanıasyn jaldaǵan. Qazir olar Almaly aýdanynda salynyp jatqan «Vesnovka» turǵyn úı kesheniniń qurylysyn qolǵa alypty. Munda da «Ush Qonyr» turǵyn úı kesheni sekildi páterlerdi satý úshin «Leader Group» kompanıasyn jaldaǵan. Bul faktini basqarma anyqtap, úleskerlermen kezdesý ótkizgen. Nátıjesinde aryzdy polısıa men sybaılas jemqorlyqqa qarsy qyzmetke tapsyrypty.
- Búgingi kúni «Ush Qonyr» turǵyn úı kesheniniń barlyq páterleri arestke qoıylǵan. «Vesnovka» turǵyn úı kesheniniń qurylysy toqtap tur. «Lıder Grýpp» kompanıasynyń qyzmeti toqtatyldy, sebebi tergeý júrip jatyr. Basshyǵa qatysty bultartpaý sharasy qoldanyldy.
Tıisti máselege qatysty qala prokýrory Berik Júıriktaevtyń aıtýynsha barlyq ister bir óndiriske biriktirilgen. Tintýler júrgizilip, barlyq qujattar tárkilenipti. Arnaıy saraptama daıyndalǵan. 141 páter arestte tur eken. Qazirdiń ózinde bul is boıynsha 50 jábirlenýshi jaýapqa tartylypty.
Qala ákimi tıisti organdarǵa jaǵdaıdy baqylaýǵa alyp, kinálilerdi jazalaýdy tapsyr.
- Qalalyq prokýratýradan isti baqylaýǵa alýdy, páterlerdi arestke qoıýdy qalaı júrgizilgenin, onyń qalaı jumys isteıtinin tekserýdi suraımyn. Al biz ony anyqtaımyz. Eger páterlerdi satýmen aınalysqan basshyǵa qatysty shekteý sharalary qoldanylsa jáne ol, úleskerlerdiń aıtýynsha, satýdy jalǵastyrsa, onda onyń kásipkerlik qyzmetin shekteý qajet. Eger ol jumysyn jalǵastyra berse, onda zańda belgilengen tártippen usynys engizińiz. Zań talaby boıynsha bas bostandyǵynan aıyryńyz,- dep Almaty qalasynyń ákimi Erbolat Dosaev tıisti organdarǵa jaǵdaıdy baqylaýǵa alýdy tapsyrdy.