Polısıanyń kınologıalyq qyzmeti – bul qylmystardyń aldyn alý jáne ashý, qylmyskerlerdi izdeý, ustaý jáne qoǵamdyq tártipti saqtaý úshin qyzmettik-izdestirý ıtterdi daıyndaıtyn arnaıy bólim.
Búgingi tańda polısıa qyzmetinde 600-den astam túrli tuqymdy ıt bar. Olar negizinen esirtki men jarylǵysh zattardy, adamdardy izdeý, tintý, izge túsý jáne shabýyldaýǵa beıim belgıalyq jáne nemis ovcharkalary, labrador-retrıverler men basqa tuqymdy ıtter, dep habarlaıdy Almaty-akshamy.kz Polisia.kz-ke silteme jasap.
Kınologtar men olardyń qamqorlyǵyndaǵy ıtterdi bazalyq daıarlaý Almaty qalasynda İİM Kınologıalyq qyzmet ortalyǵynda júzege asyrylady. Munda jyl saıyn 150-ge jýyq polısıa qyzmetkeri oqytý jáne qaıta daıarlaýdan ótedi. Ortalyqtyń teńgeriminde 34 qyzmettik ıt bar. Ótken jyly ortalyqta 30 kúshik dúnıege keldi: 26 nemis ovcharkasy jáne 4 malınýa. Kúshikter 45 kúnge tolǵanda alǵashqy synaq – polısıa qyzmetine jaramdylyq testileýinen ótedi. Olardy daıarlaý 4-6 aıdan bastalady. Qyzmetten basqa polısıa ıtteri taǵy bir mańyzdy fýnksıany oryndaıdy.
Kınologıalyq ortalyqtardyń ıtteri aýtızm spektri buzylǵan balalarǵa arnalǵan kanısterapıaǵa qatysady. Bala úshin ıt motıvator rólin oryndaıdy: ol búldirshindi belsendi jumys isteýge jáne jetistikke jetýge yntalandyrady. Itpen qarym-qatynas psıhıkalyq jáne emosıonaldyq qabiletterdiń damýyna yqpal etedi, sonymen qatar qozǵalys fýnksıalaryn jaqsartady. 2022 jyly kınologıalyq bólimshelerdiń qatysýymen 6023 quqyq buzýshylyq anyqtaldy, onyń ishinde: 2360 urlyq, 188 tonaý, 26 qaraqshylyq, 55 kisi óltirý derekteri. 473 odorologıalyq zertteý júrgizildi, onyń ishinde 378-i oń nátıjeli. Olardyń nátıjeleri kóptegen qylmystar boıynsha dáleldemelik bazaǵa engizilgen. Sıntetıkalyq esirtkilerdiń kóptep taralýymen mamandarǵa qyzmettik ıtterdi osy zattardy izdeýge úıretý mindeti qoıyldy. Hımık-mamandar ıisi barlyq sıntetıkalyq esirtkilerde bolatyn zattardy bólip alyp, ıis ımıtatorlaryn daıyndady.
Qazir ár oblysta polısıada jańa psıhobelsendi zattardyń ıisin anyqtap, taba alatyn ıt bar. Kınologtar qyzmettik ıtterimen birge esirtki kontrabandasy faktilerin anyqtaý úshin poshta jóneltilimderin tekserýge únemi qatysady. Kınolog úshin ıttiń minez-qulqyndaǵy kez kelgen ózgeristerdi baıqaý jáne onyń sıgnaldaryn ońaı túsiný óte mańyzdy. Ótken jyly olardyń kómegimen 636 keliden astam esirtki, onyń ishinde 114 keli sıntetıkalyq esirtki tárkilenip, zańsyz aınalymǵa jiberilmedi. Kınologıalyq qyzmettiń arqasynda esirtkiniń zańsyz aınalymynyń 900-ge jýyq faktisiniń joly kesildi.