Elde jansaqtaý bólimderine túsken naýqastardyń sany kún ótken saıyn artyp barady
Ýkraınanyń Kahovka qalasynda dárigerler qatarynan 42 saǵat aýrýhanada tynymsyz ekbek etýde. Osy aptada táýligine 838 adam koronavırýstan kóz jumyp antırekord ornady, dep habarlaıdy Almaty-akshamy.kz 24.kz-ke silteme jasap.
Eldiń densaýlyq saqtaý mınıstrligi aýyr halde jatqandardyń 96 prosenti koronavırýsqa qarsy vaksına qabyldamaǵanyn habarlaıdy. Jalpy Ýkrınada áli kúnge deıin egilmegen halyqtyń qarasy qalyń. El prezıdenti Vladımır Zelenskıı ýkraınalyqtardy vaksına saldyrýǵa yntalandyrý úshin ár egilgen turǵynǵa syıaqy retinde 1 myń grıven tóleýdi ýáde etti. Bul shamamen 16 300 teńge. Bul aımaqtaǵy ortasha jalaqynyń 5 prosenti. Búginde Ýkraınada Pfizer-BioNTech, Moderna, AstraZeneca men Sinovac preparattary qoljetimdi. Dese de, 41 mln halyqtyń tek 21 prosenti ǵana tolyq egilgen dep esepteledi.
«Naýqastardyń ólimi bizdi eseńgiretip tastaıdy. Keıbireýler psıhıkalyq aýytqýǵa ushyrap jatady. Dárigerlerdiń shashy aǵara bastady. Jaǵdaıdy qabyldaý óte qıyn. Robot emespiz, adam bolǵannan keıin biz de kúızelemiz», - dedi anestezıolog-reanımatolog Aleksandr Molchanov.