Almaty qalasy №15 emhanasynyń pedıatr-dárigeri Móldir Ákimjan Óńirlik komýnıkasıalar qyzmetiniń alańynda sóz sóılep, ýaqyt óte kele antıdenelerdiń deńgeıi tómendeıtinin, sondyqtan KVI-ge qarsy ekpeni qaıtalaý kerek ekenin eske saldy dep habarlaıdy almaty-akshamy.kz
M. Ákimjan revaksınasıa máselelerindegi halyqaralyq tájirıbe týraly aıtyp berdi.
- Izraıl – halyq ekpe salyp, epıdemıologıalyq ahýaldy turaqtandyrǵan alǵashqy elderdiń biri. Alaıda, jazda jańa «delta» nusqasynyń paıda bolýymen adamdar qaıtadan juqtyra bastady. Sodan keıin ǵalymdar men dárigerler vaksınanyń ekinshi dozasynan keıin 6 aıdan keıin ımýnıtet anaǵurlym juqpaly «delta» nusqasynyń paıda bolýy aıasynda aıtarlyqtaı tómendegenin anyqtady. Nátıjesinde Izraıl revaksınasıa týraly sheshim qabyldady, - dedi pedıatr.
Ol revaksınasıa aıasynda aýqymdy zertteý derekterimen bólisti.
- Zertteýge 60 jastan asqan 1 mıllıon 144 myńnan astam turǵyn qatysty. Olardyń barlyǵy vaksınanyń eki komponentin 2021 jyldyń 1 naýryzyna deıin aldy. Keıin olardyń barlyǵy qaıta vaksınalandy. Úshinshi ekpe KVI qaıta juqtyrý yqtımaldyǵyn 11 esege, al aýyr aǵymdy 15 esege tómendetkeni anyqtaldy, - dedi Móldir Ákimjan.
Dáriger barlyq almatylyqtarǵa KVI vaksınasynyń eki komponentin de alýǵa, al ekpeni tolyq alǵandarǵa revaksınasıadan ýaqytyly ótýge keńes berdi.