Kıevtegi elshiliktiń qyzmetkerleri kúni-túni jumys isteýde
Ýkraına kepteliste turǵan qazaqstandyqtardyń jartysy shekaradan ótip, Polshaǵa jetti. Bul týraly QR Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz.
«Sońǵy birneshe kún boıy álemniń nazary Ýkraınada. Bizdiń Kıevtegi elshiliktiń qyzmetkerleri kúni-túni jumys isteýde. Qazaqstannyń azamattaryna kómek kórsetip qana qoımaı, ornalasqan elderindegi jaǵdaı jóninde ózekti aqparatty da jiberip turady. Shuǵyl aqparat almasý, týyndaǵan máselelerdi jedel sheshý maqsatynda árıne belgili bir messendjerde jumys chatyn ashtyq. Sol chatta birge qýanyp, birge kúrsinip jatamyz. Ýkraınadaǵy áriptesterimizge suraqtardy jaýdyryp, sol turǵan jerinde jaýap ber dep jazatynymyz da bar», - dep jazdy Aıbek Smadıarov Facebook paraqshasynda.
Sondaı-aq, mınıstrlik ókili shekarada turǵan otandastarymyzdyń jartysy Polshaǵa jetkenin habarlady.
«Keshe ǵana BAQ-qa arnalǵan brıfıńte aıtyp ótkenimdeı, QR azamattary bar birneshe avtobýs shekaraǵa qaraı jolda kólik keptelisinde turdy. Olardyń jartysy shekaradan ótip, aman-esen Polshanyń aýmaǵynda azamattarymyzdyń ekinshi toby kelgenshe qonaq úıge ornalastyrdy», - deıdi ol.
Eske sala keteıike, keshe syrtqy ister mınıstrligi qazaqstandyqtar mingen 3 avtobýstyń Ýkraına shekarasynda turǵany týraly habarlaǵan edi.