Mundaıda Ulttyq qor qarajatyn kóbeıtetin jalǵyz faktor – ınvestısıalyq kiris.
Ulttyq ekonomıka mınıstri Nurlan Baıbazarov Parlamentke 2025-2027 jyldarǵa arnalǵan kepildendirilgen transfert týraly zań jobasyn tanystyrdy, dep habarlaıdy aqshamnews.kz
Baıbazarovtyń aıtýynsha, zań jobasy Búdjet kodeksiniń erejeleri negizinde ázirlengen. Zań jobasynda munaıdyń kesimdi baǵasy 2025 jyly barreline 42,3 AQSH dollary, 2026-2027 jyldary barreline 41 – 39,4 AQSH dollary deńgeıinde belgilengen.
«Osyny eskere otyryp, Ulttyq qordan kepildendirilgen transferttiń mólsheri 2025-2027 jyldarǵa jyl saıyn 2 trln teńge kóleminde aıqyndaldy. Josparly kezeńde Ulttyq qordyń taza valútalyq aktıvteri boljam boıynsha 2025 jyly 62,2 mlrd AQSH dollaryn, 2026-2027 jyldary 69,9 – 78,7 mlrd AQSH dollaryn quraıdy. Zań jobasyn qabyldaý respýblıkalyq búdjettiń teńgerimdiligin qamtamasyz etýge múmkindik bered»i, – deıdi Baıbazarov.
Al Ulttyq bank tóraǵasy Tımýr Súleımenov munaıǵa jatpaıtyn tapshylyqtyń joǵary kúıinde qalǵanyn, jalpy tapshylyqty jabý úshin búdjet – Ulttyq qordyń transfertterine súıenetinin aıtady.
«Ulttyq qorǵa qarajattyń túsýi men ony alýda – balans teris. Iaǵnı, alynǵan qarajat onyń túsiminen asyp ketip otyr. Mundaı jaǵdaıda, Ulttyq qor qarajatyn kóbeıtetin jalǵyz faktor – ınvestısıalyq kiris. Ol bıyl toǵyz aıda 10,27% nemese 6,16 mlrd dollar boldy. Tek osynyń arqasynda Ulttyq qordyń aktıvteri jyl basynan beri 4,5%-ke ósip, 62,7 mlrd dollarǵa jetti. Jalpy alǵanda, bıyl Ulttyq qordan beriletin tikeleı transfertter kólemi 5,6 trln teńgeni qurady. Osyǵan uqsas deńgeı, ıaǵnı 5,3 trln teńge keler jyldyń búdjetinde qarastyryldy», – deıdi ol.