Oljas Bektenov Májilis depýtattarynyń suraqtaryna jaýap berdi
Májilistiń jalpy otyrysynda depýtat Asqat Rahymjanov Premer-mınıstrge 2029 jylǵa qaraı Qazaqstan ekonomıkasy ósimin $450 mlrd-qa deıin qamtamasyz etý jónindegi Prezıdent tapsyrmasyn oryndaý boıynsha Úkimettiń josparyna qatysty saýalyn joldady, dep habarlaıdy aqshamnews.kz
«Elimizdiń 2025-2029 jyldarǵa arnalǵan áleýmettik-ekonomıkalyq damý boljamyna sáıkes, bazalyq senarı boıynsha JİÓ-niń jyldyq ósimi orta eseppen 5,4% deńgeıinde josparlanǵan. Mundaı kórsetkishke qol jetkizilgen jaǵdaıda elimizdiń ishki jalpy ónimi 2025 jylǵy $321 mlrd-tan 2029 jyly $498 mlrd-qa deıin ósedi. Osylaısha, Memleket basshysynyń 2029 jylǵa qaraı JİÓ kólemin $450 mlrd-qa deıin jetkizý mindeti oryndalady.
Biraq, Úkimet óz jumysynda Respýblıkanyń 2029 jylǵa deıingi ulttyq damý josparynda kózdelgen joǵary mindetter qoıyp otyr. Atalǵan qujatqa sáıkes, JİÓ-niń jyldyq ósimi 5,6%-dan 6,9%-ǵa deıin bolýy tıis. Bul – óte aýqymdy mindet. Mundaı kórsetkishterge qol jetkizý úshin ekonomıkany ártaraptandyrý, onyń kúrdeliligin arttyrý, elimizde tereńdete óńdelgen ónim óndirisin uıymdastyrý, shıkizatqa táýeldilikten arylý boıynsha belsendi jumys qajet.
Ózderińiz bilesizder, bıylǵy 9 aıdyń qorytyndysy boıynsha JİÓ ósimi 4%-dy qurady. Sonymen qatar bul ósimge munaı óndirý kóleminiń tómendeýi aıasynda qol jetkizildi. Iaǵnı, ósim basqa da munaıdan tys salalar esebinen ósip jatyr. Ekonomıka aýyl sharýashylyǵy esebinen damyp keledi, ol 11,4%-ǵa ósti. Kólik, saýda esebinen ósim 6%-dan joǵary kórsetkish kórsetti. Qurylys 10%-dan astam ósti. Osylaısha, bul salalardaǵy ósim jalpy ekonomıkanyń, JİÓ-niń ósimin qoldaýǵa múmkindik beredi. Árıne, bul jetkiliksiz, biz muny túsinemiz, sondyqtan da túıindi másele boıynsha qazirdiń ózinde jumys istep jatyrmyz. Bul – elimizdegi iri ındýstrıalyq jáne ınfraqurylymdyq jobalardy iske asyrý úshin ekonomıkaǵa eleýli ınvestısıa kólemin tartý.
Ósý múmkindikteriniń biri – ınfraqurylymǵa óte mańyzdy ınvestısıalardy kózdeıtin Ulttyq ınfraqurylymdy damytý josparyn iske asyrý bolmaq. Sondaı-aq Prezıdent Joldaýynda bergen tapsyrmasyna sáıkes, TKSH júıesin jańǵyrtýdyń jańa ulttyq jobasyn ázirleý sońǵy satyda tur.
Ulttyq jobada 2029-2030 jyldarǵa deıin jalpy ınvestısıa kólemi shamamen 10 trln teńge mólsherinde qarastyrylǵan. Joba ınjenerlik ınfraqurylymdy aıtarlyqtaı jańartýmen qatar, ózderińiz biletindeı, bul salada tozý kórsetkishi óte tómen, bul – bizdiń otandyq bıznes úshin úlken rezerv.
Ulttyq jobada biz barlyq taýarlardy, jumystardy, qyzmetterdi otandyq kásipkerlerden basym túrde satyp alýdy kózdep otyrmyz. Osylaısha, órshil maqsattarǵa jetý úshin kóp jumys qajet. Prezıdenttiń tapsyrmasy sózsiz oryndalady», — dep atap ótti Premer-mınıstr.