Sanaq eki tásilmen júrgiziledi: sanaq.gov.kz arnaıy saıtyndaǵy ınternet-saýalnama arqyly 45 kún ishinde ınternet-saýalnama júrgizý jáne elektrondy planshetterdi qoldana otyryp, ıntervúerlerge ádettegi jappaı saýalnama júrgizý.

QR Premer-Mınıstri Asqar Mamınniń tóraǵalyǵymen ótken Úkimet otyrysynda ulttyq halyq sanaǵyna daıyndyq barysy qaraldy, dep habarlaıdy Almaty-akshamy.kz Rrimeminister.kz saıtyna silteme jasap. 
 
QR Strategıalyq josparlaý jáne reformalar agenttiginiń Ulttyq statısıka búrosynyń basshysy Nurbolat Aıdapkelov, Atyraý oblysynyń ákimi Mahambet Dosmuhambetov, Aqtóbe oblysynyń ákimi Ońdasyn Orazalın, Shymkent qalasynyń ákimi Murat Áıtenov baıandama jasady. 

Memleket basshysy Qasym-Jomart Toqaevtyń tapsyrmasy boıynsha 2021 jylǵy 1 qyrkúıekten 30 qazan aralyǵynda halyq sanaǵyn ótkizý josparlanýda. Sanaq prosesin avtomattandyrý úshin qaǵaz tasymaldaýshylardan tolyq bas tarta otyryp, sıfrlyq tehnologıalar qoldanylatyn bolady. 

Qosymsha Aitu Messenger otandyq mobıldi qosymshasy arqyly sanaqtan ótý múmkindigi beriletin bolady. Respondentter Halyqqa qyzmet kórsetý ortalyqtarynda, ákimdikterde, poshta bólimshelerinde, mektepter men saýda ortalyqtarynda ornalasatyn arnaıy uıymdastyrylǵan nusqaýlyq ýchaskelerde sanaqtan óte alady. 

Sanaq júrgizý kezinde 32 myń adam jumysqa ornalastyrylady. Úkimet basshysy Almaty jáne Nur-Sultan qalalary, Qostanaı jáne Shyǵys Qazaqstan oblystary ákimdikteriniń halyq sanaǵyna daıyndyǵy boıynsha jumysyna oń baǵa berdi. 

«Bul is-sharanyń áleýmettik-ekonomıkalyq mańyzy zor. Sanaq nátıjesi boıynsha meılinshe dál derekter bolyp tabylatyn ári eldegi ahýaldy taldaýǵa, boljam jasaýǵa jáne tıisti sheshimder qabyldaýǵa negiz bolatyn kóptegen kórsetkishter alynady. Sondyqtan elimizdiń ár azamatynyń sanaqqa qatysýynyń mańyzy óte zor», —  dedi Asqar Mamın.