El tarıhynda Paralımpıadaǵa eń kóp sportshy qatysady
Búgin Tokıoda XVI Paralımpıada oıyndary bastaldy, dep habarlaıdy Almaty-akshamy.kz.
24 tamyz-5 qyrkúıek aralyǵynda ótetin Paralımpıadaǵa elimizdiń atynan 7 sport túrinen 25 para sportshy qatysady.
Japonıanyń ulttyq stadıonynda ótetin saltanatty ashylý rásiminde elimizdiń Týyn taekvondodan eki dúrkin álem chempıony, úsh dúrkin Azıa chempıony, Eýropa chempıonatynyń úsh dúrkin jeńimpazy Nurlan Dombaev pen paýerlıftıngten Rıo Paralımpıadasynyń kúmis júldegeri Raýshan Qoıshybaeva ustaıdy.
Atalǵan joldamalardyń jeteýi – sýda júzýden, altaýy – dzúdodan, beseýi – paýerlıftıngten, úsheýi – taekvondodan, ekeýi – jeńil atletıkadan. Sonymen qatar otandyq sportshylar alǵash ret kanoede eskek esý men oq atýdan joldama ıelendi.
Bıyl Qazaqstan táýelsiz el retinde altynshy ret Paralımpıadaǵa qatysady. Osyǵan deıingi kórsetkishter tómendegideı:
Qazaqstan atynan 1996 jyly Atlantadaǵy Paralımpıadaǵa – 12, 2000 jyly Sıdneıge – 2, Afınaǵa – 8, Beıjińge – 3, Londonǵa – 7, Rıo-de-Janeıroǵa – 10 sportshy barǵan. Qazaqstandyq atletter Rıodaǵy Paralımpıada alǵash ret júlde aldy. Brazılıa tórinde Zýlfıa Gabıdýlına chempıon atansa, Raýshan Qoıshybaeva kúmis júldege ıe boldy.
Paralımpıada básekelerin Tokıoda XXXII jazǵy Olımpıada jarystary ótken dál sol sport nysandary qabyldaıdy. Jalpy Tokıodaǵy Paralımpıadada 136 memleketten 4400-ge jýyq sportshy 22 sport túrinen synǵa túsedi.
Bıylǵy tórt jyldyqtyń basty dodasyna badmınton men taekvondo sporty jańadan qosyldy. Elimizdiń atynan 3 taekvondoshy júlde úshin talassa, badmıntonnan sportshy aparmaımyz. Bul eki sport túri keıingi jyldary kenjelep qalǵan jelkendi keme jarysy men shaǵyn fýtboldy aýystyrady.