Búgin Tótenshe jaǵdaılar mınıstri Shyńǵys Árinov Úkimettiń órt qaýipti kezeńge daıyndyq máselesi jónindegi otyrysynda sóz sóıledi.
TJ mınıstri habarlaǵandaı, Tótenshe jaǵdaılar mınıstrligi órt qaýipti kezeńde halyqtyń jáne el aýmaǵynyń qaýipsizdigin qamtamasyz etý úshin keshendi sharalar qabyldaýda, dep habarlaıdy Almaty-akshamy.kz QR TJM-ge silteme jasap.
Boljam boıynsha, jaz ystyq bolady, tabıǵı órtterdiń bolý qaýpi joǵary. Qazirdiń ózinde, elimizde 27 orman órti jáne 122 dala janýy tirkeldi. Olardyń kópshiligi mınıstrlik kúshteriniń qatysýymen, onyń ishinde avıasıa tartý arqyly joıyldy.
Óńirlerde órt qaýipsizdigi boıynsha profılaktıkalyq is-sharalar jalǵasýda. Ormandy dala alqaptary men demalys oryndarynda mobıldi toptar reıdter júrgizip, nátıjesinde órt qaýipsizdigi erejelerin buzǵany úshin 630 adamǵa aıyppul salyndy. Sonymen qatar, sharýa qojalyqtaryn aralaý jumystary júrgizilýde.
Tabıǵı órtterge den qoıý algorıtmin praktıkalyq pysyqtaý úshin ótken jyly «Ormandala-2023» oqý-jattyǵýy ótkizildi. Bıyl 15-16 mamyrda elimizdiń barlyq óńirlerinde «Órt-2024» respýblıkalyq komandalyq-shtabtyq oqý-jattyǵý ótkiziledi. Oqý-jattyǵýdy úılestirý jónindegi respýblıkalyq shtab Abaı oblysynyń «Semeı Ormany MOTR» RMM Borodýlıha fılıalynyń aýmaǵynda ornalasqan. Oqý-jattyǵý sheńberinde eki kún ishinde barlyq óńirlerde profılaktıkalyq is-sharalar kesheni, sondaı-aq azamattyq qorǵaý qyzmetterimen jáne quralymdarymen praktıkalyq is-qımyldar júrgiziledi.
Barlyq óńirlerde orman sharýashylyǵy mekemelerimen 53 órt-taktıkalyq oqý-jattyǵý ótkizildi. Mınıstrliktiń oqý ortalyqtarynda orman kúzetiniń 1 300 jumysshysy oqydy.
Ár óńirde iri órttermen kúresý úshin jalpy sany respýblıka boıynsha shamamen 50 myń adam jáne 10 myńnan astam tehnıkadan turatyn kúshter men quraldar toptamasy daıyndaldy. Qazavıaqutqarý avıasıasynyń 19 borty turaqty daıyndyq rejıminde tur, onyń 9-y sý tógetin qurylǵylarmen jabdyqtalǵan. Aerovızýaldy barlaý úshin 120 ushqyshsyz ushý apparaty bar.
TJ mınıstrligi azamattyq qorǵaý qyzmetterimen birlesip eldegi órt qaýipsizdigin qamtamasyz etý úshin qajetti sharalardy qabyldaıtyn bolady.
«Qazirgi tańda elimizde bolyp jatqan sý tasqyny TJM-nyń kez-kelgen qaýip-qaterlerge daıyn ekendigin kórsetip jatyr. Dál osy rejımde órt qaýipti kezeńde barlyq qajetti is-sharalar uıymdastyrylatyn bolady», - dep TJM basshysy aqparattandyrdy.